
TIRANË- Miku i Meritonit, gazetari Arbër Zeka, në një intervistë për ‘Shqipëria Live” foli për rrëfimin tronditës të Meritonit për djalin e tij, dhe për marrëdhënien që ai ka me ish-partneren e tij, Egestën.
Zeka tha se Meritoni ka pasur vështirësi për të qenë pranë familjes dhe se lidhja me ish-partneren nuk ka qenë e shëndoshë. Sa për reagimin e ish-bashkëshortes së Meritonit, ai tha se nuk është momenti për hakmarrje, dhe në këto momente sipas tij duhet treguar maturi.
“Unë e kam pasur rastin ta takoj djalin e Meritonit. Nuk dua të futem në raportin mes çiftit, por Meritoni ka pasur vështirësi gjatë gjithë kohës. E ka pasur të pamundur me qenë pranë fëmijës. Mua ma ka thënë vonë, gjatë udhëtimit në Amerikë në muajin maj vitin e shkuar. Në avion ma ka thënë këtë, ofertat me u fut në Big Brother i ka pasur që te Big i parë dhe e ka pasur në plan këtë kauzë. Nëse më lejohet shkurt dhe qartë. Lidhja nuk ka qenë e shëndoshë, nuk do shumë koment. Duhet me pas maturinë, lidhja nuk ka qenë e shëndoshe se të ishte ndryshe… hakmarrja nuk është gjëja më e mirë në këtë pikë”, tha miku i Meritonit.
Meritoni tronditi me rrëfimin e tij gjatë mbrëmjes së shtunës për djalin, ku tregoi për herë të parë se vuan nga autizmi. Meritoni tha se djalin e tij e takoi për herë të parë kur ai ishte dy vjeç, pasi nuk mund të udhëtonte sepse nuk kishte vizë.
Mes lotësh, Meritoni tha se kauza e tij brenda Big Brotherit është pikërisht autizmi dhe nëse do të fitonte çmimin e madh, gjysma do të shkonte për djalin e tij, gjysma për fëmijët e tjerë me autizëm. Nga ana tjetër, ish-partnerja e tij Egesta ka paralajmëruar se shumë shpejt do të tregojë anën e saj të historisë, duke aluduar se Meritoni mund të ketë gënjyer për një pjesë të gjërave që ka thënë./ZËRI