ITALI- Skuadra më e suksesshme e Serisë A për vitin 2025, me 23 pikë të grumbulluara në 9 ndeshje është Roma e Ranierit. Sipas Transfermarkt, rikthimi i trajnerit veteran ka sjellë qetësi dhe stabilitet në një skuadër që, vetëm disa muaj më parë, ishte e zhytur në krizë. Roma renditet e shtata në Itali me ecurinë më të mirë.
Formula që ndryshoi gjithçka? Këtë e pati analizuar dje "Gazzetta dello Sport". Sipas gazetës më të vjetër sportive, Ranieri ka rigjallëruar lojtarë kyç dhe kështu ia ka dalë për ta rikthyer Romën në garë për një vend evropian. Dje, kjo gazetë theksonte se një nga sukseset më të mëdha të Ranierit ka qenë mënyra se si ai ka rikthyer në formë disa lojtarë që më parë ishin në hije. Matias Suleja, një nga blerjet më të shtrenjta të verës, ka filluar të justifikojë investimin duke treguar cilësitë e tij si një lojtar vendimtar. Një tjetër transformim i rëndësishëm ka qenë ai i turkut Zeki Çelik, i cili nga një lojtar shpesh i kritikuar është shndërruar në një element të besueshëm në mbrojtje. Gjithashtu, Mats Humelsi, i lënë në hije nga Juriçi, është rikthyer në nivelin e tij më të lartë, duke dhënë një kontribut të rëndësishëm në mbrojtje. Paredesi dhe Angelinoja janë rigjetur dhe rikthyer në dy kollona të skuadrës. Dibala, shkruante ‘’Gazzetta dello sport’’, kurrë nuk ka qenë në një formë atletike si nën urdhrat e Ranierit. Baldanzi dhe Kristante janë dy lojtarë të tjerë që duken ‘’të shpluhurosur’’. El Sharavi po ashtu.
‘’Corriere dello Sport’’ i njeh një formulë tjetër suksesit të Ranierit: zëvendësimet e duhura. Trajneri i njohur për aftësinë e tij për të lexuar lojën ka ndikuar drejtpërdrejt në rezultatin e 17 ndeshjeve në një vit e gjysmë, duke bërë ndryshime të suksesshme nga stoli. Rasti më i fundit që sportivja tjetër italiane ishte ai kundër Atletik Bilbaos, ku Eldor Shomurodov hyri si zëvendësues dhe shënoi golin e fitores në minutën e fundit. Kjo nuk ishte hera e parë që Ranieri i besonte uzbekut, i cili më parë kishte ndihmuar Romën dhe Kaljarin të përmbysnin rezultate me golat e tij.
Me këtë ecuri, Claudio Ranieri po shkruan një tjetër kapitull të suksesshëm në karrierën e tij të gjatë. Tani mbetet për t’u parë nëse Roma do të arrijë të sigurojë një vend në Europë: nën drejtimin e Ranierit, vështirë se ata do të ndalen lehtë së luftuari./ZËRI
