BARCELONA- Skuadra e Barcelonës po kërkon të shmangë një situatë të hidhur si ajo me legjendën dhe kampionin e Botës Lionel Mesi, për sa i takon yllit të tanishëm të skuadrës, Lamin Jamalit. Këtë raportonte uebsajti "Goal" duke iu referuar edhe të përditshmes spanjolle AS. Adoleshenti 17-vjeçar pritet të bëhet lojtari më i paguar i klubit, në mënyrë që negociatat për kontratën e tij të re të përfundojnë shpejt dhe me sukses.
Sipas spanjolles sportive AS, Jamali nënshkroi një kontratë me Barcelonën në vitin 2023, që do të skadojë në verën e 2026-ës, me një opsion për ta zgjatur deri në vitin 2030. Ky opsion do të aktivizohej automatikisht vitin e ardhshëm. Megjithatë, marrëveshja nuk është formalizuar, duke bërë që 17-vjeçari të mbetet zyrtarisht pa kontratë pas më shumë se 12 muajsh dhe me mundësinë teorike, që njësoj si Mesi, të largohet me parametrat zero.
Agjenti i tij, Horge Mendesi, është në bisedime me klubin për një rinovim, por ende nuk është arritur një marrëveshje.
Palët janë optimiste se Jamali do të qëndrojë të paktën deri në vitin 2030. Blaugranat, megjithatë duan të shmangin një përsëritje të situatës me Leo Mesin në vitin 2021, kur ai u largua me parametra zero drejt Paris Saint-Germain-it. Barcelona, asokohe me një borxh mbi 1 miliard paund për shkak të shpenzimeve të tepërta dhe pasojave financiare të pandemisë, nuk ishte në gjendje t’i ofronte një kontratë të re argjentinasit dhe idhullit të tifozerisë së vetë duke prodhuar një reaksion zinxhir pakënaqësie të panjohur më parë në mjediset e tifozëve të Barcelonës.
Për këtë arsye, klubi nuk dëshiron të rrezikojë përmes vonesash me marrëveshjen e Jamalit, i cili deri më tani përligj dashurinë pa kushte të tifozëve të tij: 20 gola dhe 24 asiste në 98 ndeshje me fanellën blaugrana. 3 gola dhe 8 asiste ka regjistruar edhe me fanellën e përfaqësueses spanjolle, me të cilët fitoi edhe Evropianin. AS raporton gjithashtu se Barcelona po përgatit një propozim kontrate që do ta bënte Jamalin lojtarin më të paguar të klubit.
Vetëm 1.7 milionë euro paguhet sot në vit ai që njihet si talenti më i madh i Botës. Pritet që brenda pak muajsh më e pakta të 10-fishohet me kontratën e re./ZËRI
