SHBA- Bota e tenisit ka një podcast popullor për momentin, ‘’Served with Andy Roddick’’. ‘’Served’’ ka për drejtues ish-numrin një të Botës, Andi Rodikun (Andy Rodick). Ish-tenisti profesionist amerikan, një nga lojtarët më të shquar të tenisit në fillim të viteve 2000, ish-numri një i Botës pasi fitoi US Open 2003 me Roxher Federerin, Rafael Nadalin dhe Novak Xhokoviçin në aktivitet, të martën kishte një të ftuar shumë të veçantë—Rafael Nadalin! 10 herë ishin përballur me njeri-tjetrin, 7 fitore të spanjollit dhe 3 të amerikanit, duke u takuar për herë të parë në US OPEN 2003. Dje nuk kishin një rrjetë mes tyre, por dy mikrofonë dhe luajtën me pyetje-përgigje për 1 orë e 10 minuta. 190 mijë shikime dhe 10.500 pëlqime ka marrë video në youtube ende pa u bërë 24 orë. Në këtë episod emocionues, Rafael Nadali, mbreti i fushave me dhe (14 herë fitues i Roland Garros), fituesi i 22 turneve të Grand Slamit dhe 92 titujve ATP, foli hapur për rivalitetet e tij legjendare me Roxher Federerin (Roger Federer) dhe Novak Xhokoviçin (Djokovic), Lojërat Olimpike Paris 2024, vitin e tij të fundit në turne dhe shumë më tepër.
Nadali ndau kujtime dhe analizë mbi përballjet e tij me serbin Xhokoviç, të cilat në botën e tenisit e meritojnë plotësisht emërtimin ‘’historike’’. 60 herë janë përballur me njeri-tjetrin, me bilancin 31-29 në favor të serbit.
"Ajo që ndjeja ishte se duhej të luaja në nivel të lartë për një kohë të gjatë dhe se duhej të përshtatesha gjatë ndeshjes. Nuk mund ta godisja shumë shpesh në anën e tij të majtë. Veçanërisht topat e lartë ai i merrte shpejt dhe të vinte në një situatë shumë të vështirë. Fillova ta përdorja më shpesh goditjen slice kundër tij. Ndonjëherë, për mua, funksiononte mirë. Kundër Novakut, ndonjëherë ishte e dobishme të luaje në mes të fushës, por nuk duhej t’i jepje shumë kënde loje. Me Novakun, edhe kur arrije ta shtyje pak jashtë fushës, nëse nuk krijoje shumë dëme, ai ishte në gjendje të kundërpërgjigjej dhe të të shtynte prapa. Për sa i përket kontrollit të topit, mendoj se ai është lojtari më i mirë kundër të cilit kam luajtur dhe më i miri që kam parë ndonjëherë," deklaroi Nadal.
Rivaliteti me Roxher Federerin ishte më tërheqësi për tifozët. Strategjitë e tyre për njeri-tjetrin ishin të qarta. Sa i takonte strategjisë së tij, Nadali u shpreh se e kishte të qartë që duhej ta mbante Federerin sa më larg topit. Federeri nga ana e tij përpiqej të shmangte një skenar të tillë.
‘’Goditja e tij forehand është më e mira me të cilën jam përballur ndonjëherë. Shpesh, ndeshjet tona ishin si një lojë shahu. Të gjithë e dinin strategjinë që do të ndiqnim në fushë. Në fillim të karrierave tona, e mposhtja më shpesh në fushat me dhe sesa në sipërfaqet e forta, por më vonë arrita ta mposhtja më shpesh edhe në fushat e forta’’, dëshmoi Rafa Nadali.
Spanjolli dalloi një ndryshim cilësor në karrierën e zviceranit: Në fund të karrierës së tij, ai filloi të merrte më shumë rreziqe. Sinqerisht, për mua, Roger luajti tenisin më të mirë të karrierës së tij në vitin 2017. Dukej sikur ndeshja ishte në duart e tij.Sigurisht, në fushat e forta, sepse në dhe ishte pak më ndryshe. Por, në përgjithësi, shërbimi i tij ishte më i vështirë për t’u lexuar. Ishte vërtet e vështirë të parashikoje se çfarë do të bënte.
Mes shumë diskutimeve të tjera Nadali komentoi edhe numrin 1 aktual të Botë, Janik Sinerin: Jannik është një djalë i mirë, dikush që nuk kërkon me çdo kusht të jetë në qendër të vëmendjes dhe është i përqendruar te puna e tij. Vitin e kaluar, ai u përball me një proces shumë, shumë të vështirë. Është e pabesueshme se si arriti të mbetet i fokusuar te detyrat e tij.
Nadali kujtoi momentin kur mori pishtarin olimpik nga Zinedine Zidane, si një përvojë emocionuese dhe u shpreh se pas përfundimit të Lojërave Olimpike, me t’u kthyer në shtëpi kishte vendosur se, për shkak të pamundësisë për të garuar në nivelet që dëshironte, ishte koha për t'i dhënë fund karrierës së tij profesionale në tenis./ZËRI
