SPANJË- Ish-trajneri i Milanit, Juventusit, Romës dhe Realit të Madridit, Fabio Kapelo, i larguar nga stoli që prej vitit 2018, dha një intervistë për "El Mundo". Kur flet një figurë si Kapelo, çdo fjalë meriton vëmendje. Intervista ishte e pasur me rrëfime mbi momentet kyçe të karrierës së tij, por edhe me analiza mbi futbollin modern. Ndër të tjera, ai vlerësoi Karlo Ançelotin si trajnerin më të mirë në menaxhimin e yjeve dhe kritikoi Pep Guardiolën për ndikimin e tij.
Kapelo e cilësoi Karlo Ançelotin si trajnerin më të aftë në botë për të menaxhuar lojtarët e nivelit më të lartë. "Të stërvitësh Real Madridin nuk është e lehtë, aq më pak një Real plot me yje, por ai e bën këtë punë në mënyrë të jashtëzakonshme," theksoi italiani. Sipas tij, kritikët e Ançelotit nuk e kuptojnë mirë futbollin. Kapeloja kujtoi gjithashtu se, sapo Ançeloti u tërhoq nga futbolli i luajtur, i kishte ofruar një vend në stafin e tij, por kishte mbetur në letër si kërkesë.
Duke folur për Realin e sotëm, Kapeloja u shpreh se Mbapeja dhe Vinisiusi mund të luajnë së bashku, ndonëse pranoi se jo gjithmonë dy yje përshtaten në të njëjtin ekip: "Të gjithë lojtarët e mëdhenj mund të luajnë së bashku, por ka përjashtime, si rasti i Van Nistelrojt dhe Ronaldos te Real Madridi".
Në intervistën për "El Mundo", Kapeloja e pranoi ndikimin e Guardiolës në futboll, duke e vendosur mes tri revolucionarëve më të mëdhenj të lojës, krahas Ajaksit të Krujfit dhe Milanit të Sakit. Megjithatë, ai nuk i kurseu kritikat. "Champions-in me City-n e fitoi vetëm sepse, më në fund, nuk eksperimentoi në ndeshjet vendimtare," u shpreh Kapeloja, duke shtuar se në vitet e mëparshme, si te Mançester Siti apo Bajerni i Mynihut, Guardiola shpesh ndryshonte skemat.
Këtë, sipas mjeshtrit italian, spanjolli e bënte vetëm për të treguar se suksesi ishte i tij, jo i lojtarëve.
"Kjo arrogancë i ka kushtuar disa Liga Kampionesh," theksoi ai.
Kapelo e cilësoi problematik ndryshimin që Guardiola dhe ndjekësit e tij i kanë sjellë futbollit, pasi sipas tij, e kanë ngadalësuar ritmin e lojës. Ai solli në kujtesë edhe një episod nga koha kur Guardiola luante për Romën nën drejtimin e tij: "I thashë të vraponte e pastaj të fliste".
Sot, si ambasador i Laureus World Sports Awards, Kapeloja e sheh veten ende të lidhur me futbollin: "Jam dhe do të jem gjithmonë një trajner. Nuk mund ta shmang."
Fabio Kapelo do të mbahet mend si një nga trajnerët më të suksesshëm të historisë së futbollit: 1 herë fitues i Ligës së Kampioneve me Milanin (1994), 5 herë kampion i Italisë (4 herë me Milanin, 1 herë me Romën), 2 herë kampion i Spanjës me Realin e Madridit, si dhe fitues i disa superkupave e trofeve të tjerë.
