BRITANI E MADHE- Gazeta e njohur britanike "The Guardian" publikoi një profil të kombëtares shqiptare të futbollit, e cila do të marrë pjesë për herë të dytë në kompeticionin më të madh të futbollit në Europë, "Euro 2024". Në shkrimin e publikuar në media, shkruhet se tifozët shqiptarë nuk duan të shohin kryeministrin Edi Rama...pasi e konsiderojnë si ters për kombëtaren.
"Personalitetet shqiptare do të dynden në Gjermani për të marrë pjesë në Euro, por është një njeri që shumë tifozë kuqezi mund të mos duan ta shohin, veçanërisht në stadium: kryeministrin shqiptar, Edi Rama. Kjo është për shkak të "mallkimit të tij të futbollit", siç do të thoshte folklori i tifozëve. Rama shpesh merr pjesë në evente apo fushata elektorale i veshur me fanella futbolli të skuadrave ndërkombëtare, dhe çuditërisht, kjo shpesh i paraprin një fatkeqësie për këtë ekip. Nëse pyesni tifozët shqiptarë, humbja e Manchester City nga Real Madrit me penallti në çerekfinalet e Ligës së Kampionëve në prill mund të ketë pasur të bëjë me Ramën që zbuloi projektin e ri të akademisë shqiptare të Cityt në të njëjtën ditë në Tiranë,"-shkruan "The Guardian".
Por pse është bërë kjo lidhje?
Kryeministri Edi Rama ka një stil të veçantë në veshje që zakonisht konsiston në xhupa dhe fanella të ekipeve të ndryshme të futbollit. Ndaj shpesh e kemi parë me fanella të Juventuesit, Bayernit, etj. Por si rastësi, ka ndodhur që sa herë kryeministri vishte një fanellë me logo, në ndeshjen e radhës që do të luante ajo skuadër, do të humbiste.
Megjithatë, kjo është një rastësi që është kthyer tanimë në bestytni për tifozët kuqezi. Aq sa ka tërhequr vëmendjen e medias britanike./ZËRI
