TIRANË- Lulzim Basha, si në kohën kur drejtonte Partinë Demokratike dhe kur ishte një deputet i thjeshtë në PD, ka qenë mjaft misterioz përsa i përkes vendbanimit. A thua se transparenca do të përbënte rrezik për sigurinë e tij, Basha e ka mbajtur mjaft sekret vendndodhjen e banesës ku jeton bashkë me gruan, Aurela dhe dy vajzat.
Por hermetizmi s’i ka zgjatur shumë. Herë në një apartament e herë në një vilë, denoncimet publike e kanë atashuar Bashën me pronat e familjarit të tij, kunatit Erion Isufi e me një nga kullat më të reja në Tiranë, ‘Lion Residence’.
Zanafillën e ka që pas tërmetit të 26 nëntorit….
Në vitin 2019, Basha u zhvendos në kompleksin e vilave “Long Hill”, në periferi të Tiranës, duke u larguar nga apartamenti i tij në katin e 12-të, pranë kullave tek stadiumi "Arena Kombëtare".
Me daljen e këtij lajmi, vetë Basha, përmes një njoftimi nga Partia Demokratike, sqaronte se banesa e tij po i nënshtrohej punimeve të domosdoshme, duke qenë se kishte pësuar dëme nga tërmeti.
“Për këtë arsye zoti Basha dhe familja e tij janë zhvendosur përkohesisht në një banese me qira, që nuk ka asnjë lidhje me fotot e rreme të shpërndara nga disa portale te kontrolluara nga qeveria. Banesa me qira e familjes se zotit Basha jo vetem nuk ka pishine, por është më e vogël sesa banesa e tij në rindërtim,”- njoftonte PD-ja në atë kohë.
Ironia në fakt është se me qira apo të blerë, vilat në “Long Hill” janë ndërtuar nga biznesmeni Agron Papuli, i cili akuzohej vahzdimisht nga Basha si një oligark i qeverisë dhe me lidhje të ngushta me Partinë Socialiste.
Por nuk mbaron me kaq!
Kryebashkiaku i Tiranës, Erion Veliaj tha se Lulzim Basha, njeriu që pretendonte të bëhej kryeministër i Shqipërisë, ka ndërtuar pa leje. Madje, sipas Veliajt, Basha kur ishte kryebashkiak i Tiranës, i kishte dhënë leje vetes për ndërtimin e një kati shtesë në banesën në Tiranë.
Punimet për shkak të ‘dëmeve nga tërmeti’, në fakt ishin shtimi i një kati të ri banimi.
“Leje zhvillimore ndërtimi për strukturën shtesë 1 kat mbi strukturën 12 kate në pronë të zonjës Aurela Isufi dhe Lulzim Basha. Në vendndodhje Skerdilajd Llagami dhe shoqëria që ndërton Arkimed International. Sipërfaqe e pronës që shtohet 203 m2. Vëllimi që shtohet 323 m3 mbi katin e 12,”- shkruhej në dokument.
“Kryetari i bashkisë i jep leje vetes së vet që nga kati i 12 të shkojë në kat të 13. Më thoni një tjetër njeri që ka marrë dot leje nga kjo bashki të ndërtojë kat të 13 mbi një leje të ezauruar,”- deklaroi Veliaj.
Kreu i partisë më të madhe opozitare në vend, mirë që i shtoi vetes katër dhoma në shkelje flagrante me ligjin, por nuk kishte paguar as taksën!
“Vërtetojmë se subjekti e ka likuiduar taksën e ndikimit në infrastrukturë në vlerën 171 820 lekë, por kjo pagesë është rimbursuar nga teprica kreditore e vitit 2013,”- vijon dokumenti.
Për pesë ditë, IMT-ja trokiti në derën e Bashës.
“Inspektorati i Mbrojtjes së Territorit (IMT), Bashkia Tiranë bazuar në kompetencat e ngarkuara nga ligji, si dhe referuar indicieve dhe ankesave të depozituara dhe administruara nga IMT, Bashkia Tiranë, lidhur me apartamentin e ndodhur në adresën Rr. “Dervish Hima” dhe “Skerdilajd Llagami”, Kulla 2, Kati 11/12 i banimit, për shkak të mungesës së aksesit në ambientin e sipërpërmendur, lutemi që brenda afatit 5 ditor të dorëzoni pranë Inspektoratit të Mbrojtjes së Territorit, Bashkia Tiranë, dokumentacionin tekniko-ligjor në lidhje me apartamentin në pronësinë tuaj,”- thuhej në shkresën që IMT-ja i drejton Bashës.
Basha e paditi Veliajn për shpifje, por e humbi gjyqin. Arsyeja? Nuk u paraqit në seanca dhe me heshtjen e tij, i dha të drejtë kryebashkiakut socialist…
Kështu, në kohën që vendi përballej me plagët e tërmetit të 26 nëntorit, Basha shtoi pasurinë e tij, ngriti një kat mbi apartament, si dhe mori katër vila, në Long Hills e në Gjir të Lalëzit.
Akuzat s’u ndalën me kaq…
Kryebashkiaku i Tiranës, Erion Veliaj deklaroi gjithashtu se Basha, përmes kunatit të tij, Erion Isufi, ka aplikuar në bashki për të marrë leje për të ndërtuar vilë tjetër.
Dokumentet e vilës së pestë:
Për këtë u pyet në studion e “Opinion” edhe vetë Basha, i cili tregoi se kunati i tij ka paditur Veliajn në SPAK për këtë çështje.
“Për akuzën që ka bërë sot, ai i afërmi im e ka paditur në SPAK,”- tha Basha shkurtimisht.
Tashmë, pronat e Bashës nuk janë më hedhje akuzash e kundërakuzash mes tij dhe Partisë Socialiste, por Brenda grupit të Partisë Demokratike.
Një ditë më parë, kreu i grupit parlamentar të Partisë Demokratike, Gazment Bardhi akuzoi Bashën se përmes kunatit të tij ishte bërë pronar i dy kateve të ‘Lion Residence’, një nga kullat me të reja në Tiranë.
Dokumentet e mëposhtme, të lëshuara nga Qendra Kombëtare e Biznesit, vetë Erion Isufi disponon zyrë në katin e parë të ‘Lion Residence’. Gjithashtu, Isufi, në të dyja katet e blera ka zyra për pesë kompanitë, si: Landmark Communications, Landmark Premium Print, Moveo Albania Technology dhe Landmark Technologies, si dhe për dy mediat, Revista ‘Story’ dhe ‘Elegance’.
Sipas Gazmend Bardhit, Basha ka përfituar pronat tek kjo kullë, vetëm një muaj pas humbjes së zgjedhjeve në prill të 2021-shit, pavarësisht se blerja është bërë në emër të familjarëve të tij.
Ç’tha Basha këtë herë?
Ai, as nuk e pohoi e as mohoi që i afërmi i tij të kishte blerë prona në këtë kullë, por tha: Familjarët e mi e kanë çdo gjë transparente, cent më cent taksat ndryshe nga aleancat e kullave dhe avokati i tyre më i ri, Gaz Bardhi!
