TIRANË- Gjykata e Posaçme e kërkon në sallë që ta marrë në pyetje, por Sali Berisha ka plane të tjera. Për arsye që ende nuk dihen, nesër është kërkuar mbledhja e Kryesisë së Partisë Demokratike. Zakonisht Kryesia dhe grupi parlamentar mblidhen para seancave plenare, që kësaj jave do të mungojnë, ndaj deri më tani kryefjalë besohet se do të jetë çështja e Berishës.
Por Kryesia nuk do të jetë takimi i vetëm mes demokratëve. Pasditen e të premtes, në orën 18.00, Berisha ka kërkuar edhe mbledhjen e Këshillit Kombëtar të PD. Edhe në këtë mbledhje të fundit, një do të jetë pika kryesore e rendit të ditës; situata politike e ditëve të fundit.
Ish-kryeministri i vendit, Sali Berisha u akuzua për “korrupsion pasiv” së bashku me Malltezin të shtunën nga Struktura e Posaçme e Kundër Korrupsionit dhe Krimit të Organizuar, SPAK. Por vetë ai i ka kundërshtuar akuzat duke pretenduar se procesi i privatizimit të tokës është nisur nga qeveria paraardhëse e ish-kryesministrit Fatos Nano dhe vendimet janë marrë kur vetë kryeministri Edi Rama ishte kryebashkiak i Tiranës. Ndërkohë GJKKO e kërkon në sallë për ta marrë në pyetje, edhe pse Berisha e ka deklaruar publikisht nuk do të shkojë sot në seancën në ngarkim të tij në Gjykatën e Posaçme. Berisha këmbëngul se thirrja e tij në seancë, dhe masa e sigurisë që ka lëshuar SPAK dhe GJKKO janë bërë në shkelje me Kushtetutën, pasi fillimisht nuk i kanë marrë leje Kuvendit./Zëri.ai
