GREQI- Gazeta greke 'Kathimerini' i ka kushtuar sërish një shkrim tensionit të krijuar mes Shqipërisë dhe Greqisë në lidhje me arrestimin e kryebashkiakut të zgjedhur të Himarës, Fredi Belerin. ‘Kathimerini’ shkruan sot se ‘Athina është në pritje të lëvizjes së radhës të Edi Ramës’ sa i takon çështjes Beleri.
“Pak para Krishtlindjeve, Rama kishte shpallur në fakt shkarkimin e kryebashkiakut në detyrë Jorgo Goro, i cili përballë Fredi Belerit humbi në zgjedhjet e majit, por vazhdon të qëndrojë në detyre”, shkruan gazeta, e cila përmend tre emra të mundshëm që Rama kishte propozuar për kryetar të përkohshëm të bashkisë.
Por pas një reagimi të Fredi Belerit, i cili artikulonte se kryetar i përkohshëm duhet të jetë një nga këshilltarët e zgjedhur nga rezultatet e majit, tre emrat u anuluan, shkruan me tej Kathimerini. Kujtohet se pala greke, në deklaratën me shkrim me të cilën shoqëron dosjen e Shqipërisë në fazat e ndryshme të vlerësimit të saj në BE, ka vendosur tre kushte për të mos vënë veton: betimin e Belerit, gjykimin e tij të drejtë dhe respektimi i prezumimit të pafajësisë.
“Athina është padyshim në konsultim me Belerin, pasi po kërkohet një raport në një çështje që shkon shumë përtej marrëdhënieve greko-shqiptare dhe, siç është parë kohët e fundit, ka ndikuar edhe në diskutimin e përgjithshëm për perspektivën evropiane të Ballkanit Perëndimor,"-thuhet në artikull.
Sfondi diplomatik
Zhvillimeve të fundit u paraprinë një sfond shumë intensiv diplomatik dhe shkëmbime mes Athinës dhe Tiranës në nivele të ndryshme. Dje ministri i Jashtëm i Shqipërisë Igli Hasani deklaroi se “ka negociata, ide dhe angazhime nga të dyja palët për të gjetur një zgjidhje”.
Sipas gazetës greke Hasani mohoi se Tirana dhe Athina po diskutojnë një "emër të pranuar" për kryebashkiakun e përkohshëm të Heimarës. Dhe ai vuri në dukje se "vendimi i gjykatës speciale po shqyrtohet nga qeveria dhe po shqyrtohen të gjitha hapat që do të çojnë në një situatë që do të krijojë një zgjidhje afatgjatë dhe të besueshme"./ZËRI
