TIRANË- Partia Demokratike ka dalë me një denoncim për vrasjen e 14-vjeçarit Martin Cani. Koordinatori rajonal për Tiranën, Klevis Balliu pretendon se Policia e Shtetit ka fshehur praninë në momentin e krimit të një personi të dytë, që mori pjesë në sherrin ku humbi jetën 14-vjeçari Cani dhe u plagos shoku i tij, Luis Meçe.
"Policia të mos drejtohet nga njerëz që kanë lidhur interesin me pushtetin dhe bandat kriminale, por me detyrën e sigurisë dhe rendit për qytetarët. Shqipëria nuk mund të jetë vendi i fëmijëve që, nëse nuk kanë babanë ose nënën në SPAK, në BKH apo në pushtet, mund të jenë të vrarë ose vrasës, dhe nëse e kanë, emri i tyre fshihet nga ngjarjet dhe përfshirja në to, dhe gjithë pasojat që lidhen me to. ‘BKH e babit’ dhe ‘SPAK-u i mamit’, pranojnë të bëhen bashkautorë në vrasje për të ruajtur punonjësit e tyre,"-tha Balliu në deklaratën e tij për shtyp.
Deklarata e koordinatorit rajonal për Tiranën, Klevis Balliu:
Një detaj tjetër dramatik është publikuar në media për ngjarjen ku humbi jetën 14 vjeçari Martin Cani. Policia ka fshehur praninë në momentin e krimit të një personi të dytë, që mori pjesë në sherrin ku humbi jetën Martini dhe u plagos një shok i tij. Ndërkohë që është identifikuar Mario Lleshi, si autor i dyshuar i krimit, policia ka fshehur një emër të dytë. Këtë e ka bërë sepse ai është i biri i një hetuesi të Byrosë Kombëtare të Hetimit-BKH dhe një zyrtareje të Prokurorisë së Posaçme-SPAK. Pra, për të mbrojtur reputacionin dhe mos ‘shqetësuar’ njerëzit e fuqishëm në drejtësinë e re, policët kanë marrë urdhër që të fshijnë nga komunikata një fakt qendror për zbardhjen e ngjarjes. Dy fëmijë familjesh të zakonshme shqiptare nuk e patën këtë fat dhe këtë mbrojtje: njëri ishte i vrari Martin Cani dhe tjetri i dyshuari si autor, Mario Përlleshaj.
Partia Demokratike e dënon me forcë këtë implikim të policisë në tjetërsimin e provave dhe shtrembërimin e fakteve, me qëllim mbrojtjen e njerëzve me pushtet dhe varrosjen e së vërtetës. Ne u kujtojmë qytetarëve se, ky nuk është rasti i parë ku policia kthehet në vrasëse apo merr anën e vrasësve. Për të riun e ndjerë Klodian Rasha, u tha se u qëllua pasi kishte armë, gjë që rezultoi e pavërtetë më pas. Për Egli Progën e vrarë në Pogradec, u tjetërsuan rrethanat e ngjarjes dhe u mor në mbrojtje vrasësi, një lidhje e Partisë Socialiste. Në Elbasan, Enea Thomollari u vra një një shpërthim eksplozivi në banesën e vet, pasi SPAK shpërfilli denoncimin e një të reje për Dumanin, jo Altinin por Nuredinin, i cili porositi vendosjen e tritolit që i mori jetën të riut.
Të dashur qytetarë, këto janë arsyet se pse Partia Demokratike e ngre zërin, me kurajë, për shkeljet e policisë dhe të organeve të drejtësisë. Për ne cdo shkelje e ligjit e pandëshkuar i hap rrugë një krimi të ri. Siç bëjnë me dije rastet e përmendura më lart këto shkelje kanë kushtuar jetë njerëzish. Për këtë ne kërkojmë që policia të mos drejtohet nga njerëz që kanë lidhur interesin me pushtetin dhe bandat kriminale, por me detyrën e sigurisë dhe rendit për qytetarët. Shqipëria nuk mund të jetë vendi i fëmijëve që, nëse nuk kanë babanë ose nënën në SPAK, në BKH apo në pushtet, mund të jenë të vrarë ose vrasës, dhe nëse e kanë, emri i tyre fshihet nga ngjarjet dhe përfshirja në to, dhe gjithë pasojat që lidhen me to. ‘BKH e babit’ dhe ‘SPAK-u i mamit’, pranojnë të bëhen bashkautorë në vrasje për të ruajtur punonjësit e tyre.
Po shqiptarët, kush i ruan? BKH dhe SPAK pranojnë të fshehin provat që implikojnë njerëzit e tyre. Janë të njëjtët njerëz që shpikin prova për kundërshtarët e tyre, ata që ngrenë zërin, që i denoncojnë, që janë në opozitë me pushtetin politik të Rilindjes që i mbron. Kjo është e vërteta. Të tjerat janë propagandë. Mos e lejoni propagandën të marrë jetën e fëmijëve tuaj dhe të mbrojë fëmijët e pushtetit. Ngrihuni, protestoni, bëjani të qartë pushtetit se jeta dhe siguria e çdo shqiptari vlen njëlloj. Sot në ora 5, ne që denoncojmë ngjarjet, që tragjeditë të mos përsëriten, marshojmë në Tiranë. Çdo prind, pa miq në qeveri apo SPAK, është i ftuar të na bashkohet!
Të hënën e 18 nëntorit, adoleshentët Martin Cani dhe Mario Prelleshi ishin konfliktuar gjatë pushimit të gjatë, por ishin ndarë nga roja i shkollës dhe mësuesit. Disa orë më pas, rreth orës 13.00, kur edhe kishin përfunduar mësimin, u ritakuan në oborr ku edhe u përleshën me thika. Autori vrau 14-vjeçarin dhe plagosi shokun e ngushtë të viktimës, Luis Meçen. Gjatë marrjes në pyetje për shkakun e sherrit, autori është shprehur se përplasja kishte nisur për një "pse më shikon?", por në asnjë moment nuk ka shprehur pendesë. Që nga dita e ngjarjes deri më sot, i mituri ishte në spital, por sot është nisur për në Kavajë, në institucionin e vuajtjes së dënimit për të miturit./ZËRI
