TIRANË-Debati mes kryeministrit Edi Rama dhe deputeti britanik Nigel Farage ka vazhduar sërish në rrjete sociale. Farage ka reaguar pas komenteve të Ramë, i cili i kërkoi të vijë në Shqipëri pas deklaratave të lëshuara nga ana e tij, lidhur me emigrantët shqiptarë të burgosur në Britaninë e Madhe.
Farage përmes një video në rrjetin social Instagram, shprehet se e pranon ftesën e Ramës për të ardhur në Shqipëri dhe për të diskutuar nga afër çështjen e emigracionit dhe të burgosjes së shqiptarëve në Britani. Deputeti britanik bën me dije se do të diskutojnë kthimin e të burgosurve, duke “këmbëngulur” se ka fituar “bastin” dhe se Rama do të duhet që të marrë mbrapsht të gjithë të burgosurit, ashtu sikurse edhe deklaroi disa ditë më parë.
Po ashtu Farage shprehet se Rama nga njëra anë bën një marrëveshje me Kryeministren italiane Giorgia Meloni për të çuar refugjatët në kampet e Gjadrit, por nga ana tjetër, refuzon të marrë shqiptarët e burgosur në Britaninë e Madhe.
"Një në 50 shqiptarë në Britani është në burg. Dhe unë fola për këtë para pak ditësh në GB News. Edi Rama, ky gjigand njeri që është Kryeministër i Shqipërisë, ka reaguar dhe ka thënë se "po flas broçkulla", se shifrat e mia janë të gjitha të gabuara. Ai gjithashtu tha: "Si guxon Britania të mendojë për të dërguar njerëz jashtë vendit që u është refuzuar kërkesa për azil". Po vetë ai është duke bërë një marrëveshje me Italinë për të marrë disa nga azilkërkuesit e tyre të dështuar. Çfarë hipokrizie nga ky Kryeministër pro-Bashkimit Europian dhe anti-Brexit. Epo, po të them një gjë, Edi: nëse je burrë i mirë, pse nuk i merr të gjithë të burgosurit tanë shqiptarë? Ai tha që nëse shifrat e mia janë të sakta, do të marrë çdo shqiptar në burg dhe do ta kthejë në Shqipëri. Ne i kemi kontrolluar dhe ri-kontrolluar shifrat tona. Jemi në rregull. Por Edi thotë, jo, keni gabim, sepse ka mijëra emigrantë të paligjshëm nga Shqipëria në Britani. Epo, kjo do të thotë që numri i kriminelëve nuk është një në 50. Ndoshta është një në tre. Ndoshta një në katër. Nuk e di. Gjithsesi, debati vazhdon me Kryeministrin shqiptar", -shprehet Nigel Farage.
Nga ana tjetër, kryeministri Edi Rama ka reaguar duke theksuar rëndësinë e bashkëpunimit midis vendeve për menaxhimin e migracionit dhe thekson se shqiptarët që punojnë dhe jetojnë në Britani kontribuojnë pozitivisht në shoqëri. Kreu i qeverisë shton së këta shqiptarë janë njerëz që japin mësim në Britani, punojnë në ndërtim dhe kujdesen për të moshuarit dhe të sëmurët atje. Rama thotë se vizita e tij në Shqipëri do ta frymëzojë me ide në vend që të luftojë kundër njerëzve.
POSTIMI:
Nigel, Nigel, Nigel… Nga “një kriminel në pesëdhjetë shqiptarë”, pretendimi juaj tani është shndërruar në: “Ndoshta është një në tre, ndoshta një në katër, nuk e di…” Vërtet?! Nuk e dini? Dhe kjo vjen pasi thoni se i keni kontrolluar dy herë shifrat?
Unë tashmë ju drejtova te të dhënat e vetë The Telegraph (me bujari, mund të shtoj) duke zgjedhur referencën tuaj, megjithëse një referencë vetëkontradiktore. Por dukeni të vendosur të vazhdoni në gabim.
Pra, më lejoni t'ju ndihmoj me sqarime të mëtejshme. Sipas të dhënave nga Ambasada e Shqipërisë në Mbretërinë e Bashkuar, një institucion që merret me njerëz të vërtetë, jo me fraza të Brexit, numri i shqiptarëve në vendin tuaj nuk është 53,000, siç sugjeron fillimisht The Telegraph. Në fakt, në të njëjtin artikull, ajo pranon, dhe citoj, “analiza ka të ngjarë ta ketë nënvlerësuar madhësinë e popullsisë shqiptare”. Pastaj spekulon se shifra mund të jetë deri në 140,000. Në realitet, z.@Nigel_Farage E di çfarë? Shifra është mbi 300,000, vëlla! Këta janë njerëz që mësojnë fëmijët tuaj, që ndërtojnë shtëpitë tuaja, që kujdesen për të moshuarit dhe të sëmurët tuaj. Ata nuk janë mish për dhëmbët e propagandës së shpëlarjes së trurit pas Brexit-it. Ata janë pjesë e strukturës së gjallë dhe që merr frymë e shoqërisë suaj.
Edhe pa kontrolluar moshën, gjininë apo statusin socioekonomik, pretendimet tuaja bien. As një në pesëdhjetë. Dhe sigurisht jo një në tre ose katër. Këto nuk janë statistika, janë taktika frikësimi të maskuara si të dhëna. Pra, më lejoni t'ju pyes qartë: pse është kaq e vështirë të pranosh se ke gabuar, pa zvarritur në baltë një komunitet të tërë njerëzish të shkëlqyer dhe punëtorë që i shërbejnë atdheut tënd me dinjitet sikur të ishte i tyri?
Britania është tashmë e madhe dhe jo më pak për shkak të diversitetit, qëndrueshmërisë dhe forcës së saj shumëkulturore. Një komb në stres politik post-traumatik nuk ka nevojë për kurbane. Nuk ka nevojë për goditje të kota. Dhe sigurisht nuk ka nevojë për mite në vend të fakteve. Shpresoj sinqerisht që vizita juaj e ardhshme në Shqipëri t'ju frymëzojë të luftoni për ide, në vend që të luftoni kundër njerëzve - në frymën e traditës së madhe liberale për të cilën vendi juaj ka qëndruar prej kohësh. Pres me padurim t'ju mirëpres në vendin tonë të bukur si mysafir nderi. Por, përpara se të vini për të shijuar diellin e vërtetë dhe mikpritjen e sinqertë, a mund të biem dakord të diskutojmë faktet, jo fantazitë tuaja pas së vërtetës? Le të caktojmë datën.
Gjithçka filloi pasi kryeministri Edi Rama në një intervistë për "The Guardian", refuzoi sërish ndërtimin e një qendre azilantësh në Shqipëri nga Anglia. Deklarata e Ramës,solli një reagim të ashpër nga politikani britanik Nigel Farage në median "GBNews". Farage tha se në Britaninë e Madhe shqiptarët janë aktorë kryesorë në kriminalitet, duke pretenduar se 1 në 50 shqiptarë janë në burg. Kreu i qeverisë shqiptare e sfidoi për një përballje shifrash reale, ndërsa u zotua se nëse pretendimi i tij rezulton i vërtetë, atëherë ai do t'i marrë të gjithë në Shqipëri.
Farage, një figurë e njohur e politikës britanike dhe zë i fortë i fushatës së Brexit-it, ngrit sërish pretendimin se 1 në 48 shqiptarë në Mbretërinë e Bashkuar është në burg, duke kërkuar tashmë publikisht që këta të deportohen në Shqipëri. Teksa replikat vijojnë pritet të caktohet një datë për ardhjen e deputetit britanik në Shqipëri./ZËRI
