TIRANE- Një debat me tone të forta është ndezur mes deputetit britanik Nigel Farage dhe kryeministrit shqiptar Edi Rama, pas deklaratës së këtij të fundit se do të pranonte të deportonte shqiptarët nëse shifra e të burgosurve ishte vërtet “1 në 50”. Sot, Farage është kthyer sërish në temë, duke publikuar një tjetër shifër: sipas tij, 1 në 48 shqiptarë në Britaninë e Madhe ndodhen në burg, dhe se Shqipëria duhet t’i marrë mbrapsht.
Farage shkroi në “X” (ish-Twitter): “I nderuar Edi Rama. Në Mbretërinë e Bashkuar ka 53,000 shqiptarë dhe 1,099 prej tyre janë në burgjet tona. Në fakt, kjo është 1 në 48. Do t’i kërkoj Sekretarit të Brendshëm që të organizojë që të gjithë këta të burgosur t’ju kthehen. Faleminderit për bashkëpunimin tuaj.”
Përmes një reagimi të gjatë në “X”, kryeministri shqiptar Edi Rama hodhi poshtë këtë pretendim. Ai argumentoi se numri i shqiptarëve në Mbretërinë e Bashkuar është rreth 140 mijë, jo 53 mijë si pretendon Farage, çka e çon raportin e të burgosurve në 1 në 100. Rama i referohet analizës së gazetës The Telegraph, e cila pohoi se censusi zyrtar i nënvlerëson numrin e vërtetë të shqiptarëve, duke përfshirë dhe emigrantët e paligjshëm, mes tyre 12 mijë që mbërritën me gomone gjatë vitit 2022.
“Të gabosh është njerëzore, por të ngulmosh është djallëzore”,-iu drejtua Rama Farage ndër të tjera dhe ripostoi një foto me AI, ku shihen të dy me rrobebanje buzë detit.
Reagimi i plotë i kryeministrit Edi Rama:
I dashur
@Nigel_Farage,
Gjyshja ime katolike, Zoti e pastë mëshiruar, më kujtonte shpesh një proverbë latine: Errare humanum est, sed perseverare diabolicum. Që në përkthim të lirë do të thotë: Të gabosh është njerëzore, por të këmbëngulësh në gabim është djallëzore.
Prandaj, në vend që të shqetësosh ministren e Brendshme, e cila është tashmë e zënë, ndoshta më mirë do të ishte të më thuash se kur mund të të mirëpres në Tiranë, si i ftuari im i nderit. Sepse, i dashur Nigel, shifrat qartazi nuk janë pika jote e fortë, ndaj le të jemi të qartë – TI KE HUMBUR.
“Aktualiteti” yt për shqiptarët në Britani është veçanërisht qesharak. Ti pretendon se janë 53.000. Në realitet, numri është shumë më i lartë – shumëfish i asaj që thua. Por le të qëndrojmë tek burimi yt: The Telegraph, që ishte i pari që përhapi teorinë “një në 50”, dhe që më pas e pranoi vetë:
“Analiza ka të ngjarë të ketë nënvlerësuar madhësinë e popullsisë shqiptare, pasi nuk merr parasysh emigrantët e paligjshëm, përfshirë më shumë se 12.000 që kanë mbërritur me varka të vogla në vitin 2022. Disa vlerësime sugjerojnë se numri real i shqiptarëve mund të jetë deri në 140.000 – çka do të thotë se më pak se një në 100 ndodhet në burg.”
Sa për shifrën e të burgosurve, ja një pyetje më e rëndësishme: sa prej tyre janë dënuar për vepra që nuk kanë të bëjnë fare me sistemin tuaj të vjetruar të emigracionit dhe vizave?
Po, numrat mund të jenë të mërzitshëm – por janë edhe kokëfortë. Dhe kur dikush i gabon vazhdimisht, pyetja e vërtetë është: Pse këmbëngul? Sepse, me sinqeritet, të jesh djallëzor duket poshtë edhe stilit tënd të zakonshëm.
Shqiptarët në Britani nuk janë një statistikë që mund të përdoret si dekor për teatrin politik pas-Brexit. Ata janë studentë, akademikë, ndërtues, shoferë, sipërmarrës dhe partnerë. Dhe nëse një në një mijë gabon, kjo nuk e kthen shumicën në kokë turku për konfuzionin tuaj kombëtar.
Ne kemi qëndruar krah për krah me qeverinë britanike në uljen drastike të emigracionit të paligjshëm dhe në luftën kundër krimit. Këtë e tregojnë shifrat reale – dhe kjo quhet bashkëpunim. Por “një në 50 shqiptarë në burgjet britanike”? Kjo nuk është fakt – kjo quhet iluzion pas-Brexit.
Jam duke pritur me kënaqësi të të pres në Shqipëri, siç të kam premtuar – për shumë diell, mikpritje të ngrohtë dhe fakte të vërteta.
Përplasja në distancë mes kryeministrit shqiptar Edi Rama dhe deputetit britanik Nigel Farage është rindezur pas deklaratave të këtij të fundit mbi numrin e shqiptarëve të burgosur në Britaninë e Madhe. Farage, një figurë e njohur e politikës britanike dhe zë i fortë i fushatës së Brexit-it, ka ngritur sërish pretendimin se 1 në 48 shqiptarë në Mbretërinë e Bashkuar është në burg, duke kërkuar tashmë publikisht që këta të deportohen në Shqipëri. Deklarata vjen si vazhdim i një “basti” publik që Rama bëri më herët, ku shprehej i gatshëm të pranonte kthimin e të gjithë të burgosurve shqiptarë nëse shifra “1 në 50” rezultonte e saktë./ZËRI
