SHBA- Departamenti i Efiçencës së Qeverisë në SHBA, ose e njohur ndryshe si DOGE, nën drejtimin e manjatit Elon Musk, kanë mbajtur një seancë dëgjimore lidhur me mënyrën sesi janë përdorur fondet e USAID në të gjithë botën. Gjatë seancës, e cila zgjati mbi dy orë dhe ku raportuan zyrtarë të DOGE, u përmend edhe Shqipëria. Gjatë mbledhjes së zhvilluar, gazetari investigativ i “The Daily Signal”, Tyler O’Neil tha se paratë e USAID janë përdorur edhe në Shqipëri. Sipas tij, siç duket në transkriptin e dëshmisë së bërë në Kongresin Amerikan, fondet në Shqipëri janë përdorur për "të persekutuar" liderin e opozitës, Sali Berishën.
DËSHMIA NIS MË 30.11:
“Fondacionet e Shoqërisë së Hapur dhe USAID kanë bashkëpunuar gjithashtu në mbështetjen e ‘East West Management Institute’, i cili mori 31.2 milionë dollarë nga USAID në vitin e fundit të plotë fiskal që përfundon më 30 shtator. Instituti nisi ndryshimet gjyqësore në Shqipëri, që kritikët pretendojnë se rezultuan në persekutimin e liderit të opozitës shqiptare Sali Berisha, duke i mbyllur gojën kundërshtarit të kryeministrit socialist të vendit,”- tha gazetari Tyler O'Neil, i cili dëshmoi si autori i "The Woketopus: The Dark Money Cabal Manipulating the Federal of Federal".
MOMENTI NË DËSHMI KU PËRMENDET SHQIPËRIA:
Në këtë pikë u ndal edhe kongresmenia e njohur amerikane, Marjorie Taylor Greene, e cila bashkëdrejton këtë komision. Edhe ajo ngriti pikëpyetje lidhur me financimin e USAID në Shqipëri.
“Pse USAID është përfshirë në financimin e ndryshimeve gjyqësore në Shqipëri që rezultuan në përndjekjen e liderit të opozitës shqiptare?,”-shtoi ajo.
Lidhur me diskutimet e djeshme në Kongres, ka pasur një koment nga kryedemokrati Sali Berisha. Ky i fundit, nga Foltorja e Kuvendit të Shqipërisë ka bërë një reagim publik. Nga Foltorja, Berisha u kërkoi socialistëve që të votojnë një ligj për "desorosifikimin" e Shqipërisë, pasi sipas tij kjo është një emergjencë kombëtare.
"Siç e shihni, një tërmet i madh politik ka ndodhur në botë dhe ju nuk mund të bëni të paditurin. Nuk mund të fshiheni sepse ky tërmet ka pasur pasqyrime apo reflektimin më të madh pas SHBA në Shqipëri. Ky tërmet është përmbysja e sorosizmit dhe ekstremit të majtë në SHBA, por që pati reflektime të tmerrshme edhe në këtë vend. Ju kërkoni ta kaloni në një kohë kur atje, në atë vend, çdo ditë presidenti firmos zinxhir dekretesh për desorosifikimin e SHBA, ju vazhdoni të bëni sikur do mund t’i mbani ato në këmbë. Të mbani në këmbë akte, qëndrime, të cilat janë në armiqësi të plotë jo vetëm me Shqipërinë, por me të gjitha vendet e lira, me të gjitha vendet që aspirojnë të mbeten të tilla. Ndaj me urgjencë ligji për desorosifikimin e Shqipërisë është një emergjencë kombëtare. Është më mirë të behet tani se sa kur ta bëjmë ne fill pas zgjedhjeve se do thoni po na persekutoni. Por unë u garantoj se do ketë të njëjtën peshë me ligjin që do bëhet për dekomunistizimin. Pra, më mirë të bëjmë një ligj tani. Sepse ju e dëgjuat mbrëmë Kongresin e SHBA. Nuk janë më tash vetëm tre organizatat më të mëdha në botë partiake, por është institucioni themelor i demokracisë, ku ju u cituat për akte antidemokratike dhe për plaçkitje të fondeve të SHBA. Prandaj dhe ligjin pranojeni më mirë si e keqja më e vogël për ju, se ai do bëhet pas zgjedhjeve, u garantoj se do u dhembë shumë. Më mirë tani se pas zgjedhjeve. Janë 10 milionë dollarë dhe ajo është vetëm maja e ajsbergut, që janë dhënë për reformën në drejtësi Delina Ficos. Se sa ka marrë Linda Rama nga paratë e taksapaguesve, nuk e di njeri, por edhe ajo do dalë. Prandaj të sillet ligji i desorofikimit të vendit këtu. Të presim me gërshërët e ligjit çdo lidhje me monstrën e njerëzimit, Xhorxh Soros dhe paratë e tij toksike. Pse do mbani të gjithë ju këtë barrë të rëndë, kur një pjesë nuk keni lidhje me Sorosin?,"-tha në fjalën e tij kryedemokrati.
Por një reagim, pasi u përmend nga Berisha, ka edhe nga Delina Fico. Duke qenë se Berisha e akuzoi sërish se ajo drejton një nga shoqatat që ka përfituar fonde nga USAID, Fico në rrjetin e saj "Facebook" tha se institucioni joqeveritar që ajo drejton nuk ka përfituar fonde nga Soros, por edhe projektet e financuara nga USAID dhe DASH nuk kanë asnjë lidhje me rolin e reformës në drejtësi.
"Prej vitesh Sali Berisha pretendon se East-West Management Institute (EWMI) ka luajtur rol në reformën në drejtësi në Shqipëri, financuar edhe nga fondacioni Soros. Fatkeqësisht, ky pretendim i rremë i tij u referua dje edhe në një dëgjesë në Kongresin e SHBA. E di çfarë është më e trishtuar? Në të gjitha këto vite që Sali Berisha e përsërit këtë gënjeshtër, asnjë gazetar ose media nuk ka bërë detyrën e tyre bazë: të pyesë EWMI, USAID apo dhe fondacionin Soros për këtë pretendim, si dhe të kërkojë prova për ta vërtetuar atë, si, p.sh., duke lexuar raportet mbi aktivitetin e fondet e EWMI në Shqipëri, raporte, të cilat janë publike. Po të kishin bërë thjesht detyrën e tyre si gazetarë, para se të përhapnin më tej gënjeshtrën e Sali Berishës, këta gazetarë e këto media do të kishin konstatuar se: (1) EWMI NUK KA MARRË ASNJË FINANCIM NGA FONDACIONI SOROS PËR PROGRAMET NË SHQIPËRI; (2) EWMI DHE PROGRAMET QË EWMI KA ZBATUAR NË SHQIPËRI, TË FINANCUARA NGA USAID DHE DEPARTAMENTI I SHTETIT TË SHBA, NUK KANË LUAJTUR ASNJË ROL NË REFORMËN NË DREJTËSI NË SHQIPËRI,"-shkruan Fico.
Ky ishte takimi i parë i Kongresit me anëtarët e kabinetit të Donald Trump. Grupi mori pyetje nga gazetarët për të diskutuar lidhur me gjetjet e DOGE. Aktualisht, shumica e stafit të Agjencisë së Shteteve të Bashkuara për Zhvillim Ndërkombëtar (USAID) ose janë pushuar nga puna ose janë lënë në pushim nga administrata Trump, deri në një moment të dytë. Doge, e cila nuk është një agjenci zyrtare qeveritare, është ngarkuar të bëjë shkurtime shpenzimesh, të cilat merren nga buxheti i shtetit./ZËRI
