TIRANË- Ish-ambasadorja e Shteteve të Bashkuara në Shqipëri, Yuri Kim, e cila përfundoi mandatin e saj në vendin tonë në vitin 2023, tashmë ka një detyrë të re. Diplomatja amerikane është ngarkuar me një detyrë të re, e cila i është caktuar nga administrata e presidentit Donald Trump. Ajo ka për detyrë hartimin e një liste "përjashtimore" për ngrirjen e ndihmës në Ukrainë. Lajmin e ka bërë me dije media e huaj "Politico" duke cituar burime nga Departamenti i Shtetit.
Sipas "Politico", Yuri Kim, si zëvendës-ndihmës sekretarja kryesore e shtetit për Evropën dhe Euroazinë, po punon së bashku me zyrtarë të lartë të Departamentit të Shtetit për të hartuar një listë të programeve që mund të përjashtohen nga ngrirja aktuale e ndihmës për Ukrainën. Kim do të udhëheqë punën për të vendosur se cilat fonde janë përdorur në mënyrën e duhur dhe duhet të vazhdojnë dhe cilat janë ato që duhet të ndërpriten. Këto përjashtime do t’i jepnin Kievit akses në disa asistenca ekonomike dhe të lidhura me sigurinë.
Por edhe pse i është kërkuar një koment për detyrën e re, duket se Yuri Kim ka zgjedhur që të heshtë.
PJESË NGA ARTIKULLI I POLITICO:
Që nga pushtimi i plotë i Rusisë, Kongresi ka ndarë 175 miliardë dollarë për ndihmë për Ukrainën, vendet e tjera të prekura nga lufta dhe programet e lidhura me to. Ky ka qenë rezultati i një analize të bërë nga Këshilli për Marrëdhëniet me Jashtë, i nisur që nga vjeshta e kaluar. Një pjesë e vogël e kësaj - rreth 3 miliardë dollarë, sipas CFR - është për ndihmë humanitare.
Planet për përjashtimet datojnë të paktën në fund të janarit, ditë pasi administrata Trump vendosi ngrirjen e ndihmës ndaj vendeve të tjera. Përjashtimet e propozuara mbulonin programe që varionin nga mbështetja e përgjithshme ekonomike deri te heqja e minave tokësore deri te kontrolli i narkotikëve tek programet shëndetësore. Tashmë do të përjashtohen edhe programet që mbikëqyrin financimin për të mbështetur institucionet demokratike dhe shoqërinë civile të Ukrainës.
Yuri Kim, zëvendës-ndihmëssekretarja kryesore e shtetit për Evropën dhe Euroazinë, është ngarkuar me përpilimin e një liste programesh nga zyrat dhe programet në të gjithë departamentin që kanë të bëjnë me Ukrainën.
Edhe pse u kontaktua nga Politico, Yuri Kim nuk iu përgjigj menjëherë një kërkese për koment.
Zyrtari i Departamentit të Shtetit tha se procesi po anashkalon zyrën e ndihmës së jashtme të departamentit. Kjo njësi drejtohet nga Pete Marocco, një aleat i Trump, i cili është skeptik për ndihmën e huaj, por që edhe ka marrë një rol udhëheqës në "çmontimin" e USAID-it.
Edhe Marocco nuk iu përgjigj menjëherë një kërkese për koment.
Deri më tani, Kongresi ka ndarë mbi 4 miliardë dollarë për ndihmën ushtarake ndaj Ukrainës. Këto fonde janë përdorur kryesisht për blerjen e armëve dhe pajisjeve të tjera, por disa kontrata të lidhura me këtë ndihmë zgjasin për vite, duke e bërë të vështirë llogaritjen e saktë të shpenzimeve./ZËRI
