SHBA- Prokurorët amerikanë do të kërkojnë dënimin me vdekje për Luigi Mangione, njeriun e akuzuar për vrasjen e CEO të UnitedHealthcare, Brian Thompson në dhjetor. Prokurorja e Përgjithshme Pam Bondi tha në një deklaratë për mediat se kishte urdhëruar që prokurorët federalë që të kërkonin dënimin për "vrasje të paramenduar". Thompson u qëllua për vdekje jashtë një hoteli në Nju Jork më 4 dhjetor. Policia arrestoi Mangione, 26 vjeç, disa ditë më vonë në Pensilvani.
Ai është deklaruar i pafajshëm për akuzat.
Në deklaratën për shtyp, Bondi tha se vrasja e Thompson "ishte një akt dhune politike" dhe se "mund të ketë paraqitur rrezik të madh për vdekje për persona të tjerë" aty pranë. Hetuesit thonë se Mangione ishte i motivuar të vriste Thompson, 50 vjeç, për shkak të zemërimit me kompanitë amerikane të sigurimit të kujdesit shëndetësor. Ndaj edhe Mangione po përballet me 11 akuza penale, duke përfshirë vrasjen e shkallës së parë dhe vrasjen si krim terrorizmi.
Nëse shpallet fajtor për të gjitha akuzat, ai do të përballet minimalisht me një dënim të detyrueshëm me burg përjetë, pa e fituar të drejtën e lirimit me kusht. Por, po konsiderohet edhe dënimi me vdekje.
Aktualisht, Mangione po mbahet në Qendrën e Paraburgimit Metropolitan (MDC) në Bruklin. Vrasja e Thompson ndezi një debat të gjerë rreth mënyrës sesi funksionon sistemi i kujdesit shëndetësor në SHBA. Shumë amerikanë, të cilët paguajnë më shumë për kujdesin shëndetësor se njerëzit në çdo vend tjetër të botës, shprehën zemërimin për atë që ata e shohin si trajtim të padrejtë nga firmat e sigurimeve./ZËRI
