SHBA- Evropa dhe SHBA janë tani nw anw tw ndryshme kur bëhet fjalë për marrëdhëniet me Rusinë, ndërkohë që zhvillimet dhe proceset prapa skenave po përshpejtohen për një marrëveshje paqeje për Ukrainën. Uashingtoni, pak para trevjetorit të fillimit të pushtimit dhe luftës ruse, po kërkon nga G7 të përdorë një gjuhë të butë. Financial Times raporton se SHBA-të kanë shprehur kundërshtimin e tyre ndaj projektdeklaratës së G7 me rastin e 24 shkurtit, ditës së pushtimit, e cila i referohej agresionit rus.
Rusia është etiketuar si "agresore", por SHBA nuk pajtohet me këtë dhe formulime të tjera të ngjashme. Fjala "agresion" u shfaq pesë herë në komunikatën e vitit të kaluar.
"Ne jemi të bindur se duhet të ketë një dallim midis Rusisë dhe Ukrainës, ato nuk janë të njëjta," tha një zyrtar me njohuri për këtë çështje për FT, duke shtuar se "amerikanët po e bllokojnë këtë. Ne jemi ende duke punuar për të dhe kemi shpresë”.
Pjesëmarrja e presidentit Volodymyr Zelensky ende nuk është rënë dakord, shkruan gjithashtu FT.
Mosmarrëveshja, e cila përmbys një klimë uniteti midis shtatë shteteve që ka mbizotëruar gjatë tre viteve të fundit, vjen ndërsa Donald Trump përshkallëzon retorikën e tij kundër Zelenskit, të cilin ai sapo e quajti "diktator pa zgjedhje" dje. Trump madje tha se Rusia duhet të ftohet përsëri në G7. Pala amerikane këmbëngul të moderojë retorikën e saj në lidhje me Ukrainën, pasi flet për "konflikt", siç bëri Sekretari i Shtetit Marco Rubio gjatë takimit të tij në Arabinë Saudite me homologun e tij rus Sergei Lavrov.
Në të njëjtën kohë në Evropë, Komisioni këmbëngul të flitet për një deficit të thellë demokratik në Rusi. Zëdhënësi i Komisionit Stefan de Kirchmacker, i pyetur në lidhje me përshkrimin e Donald Trump për Zelensky si një "diktator", u përgjigj se "Ukraina është një demokraci, Rusia e Putinit nuk është". Ai shtoi se “Zelensky është zgjedhur ligjërisht përmes një procesi zgjedhor të lirë, të drejtë dhe demokratik”./ZËRI
