PRAGË – Mijëra mbështetës të një partie opozitare pro-ruse çeke u mblodhën të shtunën në Pragë për të protestuar kundër qeverisë së qendrës së djathtë të vendit, duke kritikuar menaxhimin e saj të ekonomisë dhe mbështetjen ushtarake për Ukrainën. Protesta u organizua nga Lëvizja PRO, e cila nuk përfaqësohet në parlament dhe ka marrë një linjë nacionaliste, pro Moskës dhe anti-Perëndimit. Agjencia e lajmeve CTK vlerësoi pjesëmarrjen në rreth 10,000 njerëz, më e vogël se një ngjarje e ngjashme një vit më parë, e cila u zhvillua në kulmin e rritjes së çmimit të energjisë në Evropë.
"Ne bëmë një hap tjetër sot për të hequr nga rruga shkëmbin që është qeveria e zotit (Kryeministri Petr) Fiala. Ata janë agjentë të fuqive të huaja, njerëz që përmbushin urdhrat, kukulla të zakonshme. Dhe unë nuk dua më një qeveri kukull,"- tha udhëheqësi i PRO, Jindrich Raichl para turmës në sheshin Wenceslas të Pragës. E po ashtu, shtoi se Republika Çeke duhet të vërë veto ndaj çdo përpjekjeje të Ukrainës për t'u bashkuar me NATO-n.
Republika Çeke ka qenë një aleat i ngushtë i Ukrainës, duke dërguar tanke, raketahedhës, helikopterë, predha artilerie dhe materiale të tjera për të ndihmuar forcat ukrainase që luftojnë pushtimin rus. Në të kaluarën, Raichl përshëndeti gjithashtu politikat nacionaliste të kryeministrit hungarez Viktor Orban, e po ashtu bëri thirrje për një aleancë të vendeve të Evropës Qendrore për t'iu kundërvënë Brukselit./Zëri.ai
