SPANJË- Kryeministri i Spanjës, Pedro Sanchez, ka vendosur të thërrasë zgjedhje të parakohshme të përgjithshme më 29 nëntor, pasi Kongresi hodhi poshtë dy dekrete për strehimin të paraqitura nga qeveria e tij.
Dhoma e ulët votoi rrëzimin e dy dekreteve-ligjeve të premten, duke rrëzuar masat që qeveria kishte hartuar në përgjigje të krizës së strehimit. Ato rrëzuan pavarësisht negociatave të minutës së fundit për të siguruar mbështetjen e nevojshme.
Pas humbjes, Sanchez bëri një periudhë të shkurtër reflektimi, duke zhvilluar bisedime gjatë fundjavës me ministra dhe figura të larta në Partinë e tij Socialiste (PSOE).
Humbja e qeverisë në parlament të premten ishte e fundit në një seri pengesash politike për udhëheqësin e qendrës së majtë dhe u pasua nga protesta masive në të gjithë vendin për shkak të krizës së strehimit.
Qeveria spanjolle tha se mbi 70,000 protestues morën pjesë në një protestë për strehim në Madrid të shtunën.
Zemërimi kishte filluar të shtohej që nga fundi i muajit të kaluar, kur një grua 87-vjeçare, Marai del Carmen Abascal, u dëbua nga shtëpia e saj prej 70 vitesh në Madrid, pasi një fond ndërkombëtar investimesh bleu ndërtesën e saj dhe rriti qiranë.
Sipas mediave të huaja, sondazhet sugjerojnë në mënyrë dërrmuese se vendi do të votojë për një administratë të udhëhequr nga Partia Popullore e qendrës së djathtë, e cila aktualisht mbështetet nga 34% e elektoratit, krahasuar me 26% që mbështesin Partinë Socialiste.
Ndërsa popullariteti i tij në vend ka rënë, Sánchez ka fituar rëndësi në skenën ndërkombëtare gjatë vitit të kaluar si një nga udhëheqësit perëndimorë që dënoi më me forcë si Trump ashtu edhe kryeministrin izraelit Benjamin Netanyahu për konfliktet në Gaza dhe Iran.
Pedro Sanchez ka qenë kryeministër i Spanjës që nga viti 2018, duke e bërë atë një nga udhëheqësit më jetëgjatë të Evropës.
Sanchez është shquar globalisht për mbajtjen e një qëndrimi të fortë mbi çështjet progresive, nga shtetësia palestineze deri te mbrojtja e institucioneve shumëpalëshe dhe goditja e "oligarkëve të teknologjisë", edhe pse një sërë pengesash dhe skandalesh e dobësuan pozicionin e tij në vend./ZËRI
