UKRAINË-Ukraina iu kundërpërgjigj Papa Françeskut sot dhe u zotua se "kurrë" nuk do t'i dorëzohet Rusisë , duke reaguar ndaj një interviste që Papa dha në të cilën ai i kërkoi Kievit të kishte "guximin për të ngritur flamurin e bardhë dhe për të negociuar" .
Në një intervistë që dha për rrjetin televiziv shtetëror RTS dhe transmetuar dje, Papa Françesku, i pyetur për situatën në Ukrainë, tha se nuk duhet të "turpërohet të negociojë përpara se situata të përkeqësohet".
"Flamuri ynë është i verdhë dhe blu. Për këtë flamur jetojmë, vdesim dhe triumfojmë. Nuk do të ngremë kurrë më flamuj. Kur bëhet fjalë për flamurin e bardhë, ne e dimë strategjinë e Vatikanit gjatë pjesës së parë të shekullit të 20-të. I bëj thirrje që të shmangë përsëritjen e gabimeve të së kaluarës dhe të mbështesë Ukrainën dhe popullin e saj në betejën e tyre për jetën”, u përgjigj kreu i diplomacisë ukrainase, Dmytro Kuleba, në një mesazh të postuar në X (ish-Twitter).
Po ashtu edhe ambasada e Ukrainës në Vatikan i është përgjigjur deklaratave të Papa Françeskut. Ambasada deklaroi ndër të tjera se që të arrihet paqja, është njësoj si të bëhej negociatë me Hitlerin.
“Është shumë e rëndësishme të silleni me konsistencë. Kur i referohemi Luftës së Tretë Botërore, që po jetojmë tani, duhet të na jepet një mësim: në atë kohë, a kishte dikush që fliste për negociata paqeje me Adolf Hitlerin dhe një flamur të bardhë për ta kënaqur atë? Mësimi është vetëm një: nëse duam që lufta të përfundojë, ne duhet të bëjmë gjithçka që mundemi për të vrarë Dragoin!”, thuhet në reagim.
Megjithatë pritet që Papa Françesku të gjejë mundësinë për të vizituar Ukrainën./ZËRI
