SPANJË- Zyra e prokurorit publik të Madridit bëri me dije sot se kishte kërkuar të pushonte rasti i korrupsionit kundër gruas së kryeministrit spanjoll Pedro Sanchez, fill pasi ky i fundit tha se po mendonte edhe dorëheqjen nga posti i tij. Prokuroria tha se do të apelojë vendimin e së mërkurës, të dhënë nga një Gjykatë e Madridit, kundër Begonia Gomet. Ky hetim paraprak ka të bëjë me marrëdhëniet e Begonia Gomet me kompanitë private që kishin marrë ndihmë shtetërore gjatë krizës Covid-19 ose kishin nënshkruar kontrata me shtetin, ndërsa bashkëshorti i saj ishte në krye të qeverisë.
Grupi "Manos Limpias" ("Duart e Pastra") tha se e bazoi padinë në një informacion në media dhe se nuk e bazonte dot në fakte vlefshmërinë e tij. Kreu i "Manos Limpias", Miguel Bernard, tha në një postim në Facebook se organizata thjesht kishte mbledhur dhe përcjellë raportet tek një gjyqtar për të kryer detyrën si qytetar, duke mohuar se veprimi i tij ishte i motivuar politikisht.
Por vendimi i marrë për nisjen e hetimit, tronditi Sanchez, i cili vitin e kaluar siguroi një mandat tjetër në qeveri për Partinë Socialiste të Punëtorëve Spanjollë (PSOE) si udhëheqës i një koalicioni qeveritar të pakicës. Dje, ai u dërgoi një letër qytetarëve duke thënë se do të bënte një pushim pesë-ditor nga detyrat e tij dhe se do të vendoste nëse do të qëndronte apo jo në detyrë më 29 prill.
Në letrën e tij, Sanchez mohoi kategorikisht akuzat ndaj gruas së tij, e cila ende nuk ka folur publikisht.
Pse ndërhyri organizata?
Manos Limpias kishte vendosur t'i kërkonte gjykatës hapjen e një hetimi për marrëdhëniet e biznesit të Gomet-it pasi prokuroria nuk kishte marrë masa për të zbuluar nëse informacionet ishin të vërteta apo jo. Por gjithë çfarë ka ndodhur ka dëmtuar kryeministrin, i cili nëse jep dorëheqjen lë bosh postin e tij - gjë që do të çonte në një votim të një kandidati të ri në dhomën e ulët ose në zgjedhje të parakohshme në verë./ZËRI
