SHBA- Gjyqtarja jugafrikane Navanethem "Navi" Pillay, 85 vjeç, është shpallur fituese e Çmimit Nobel për Paqe "për përpjekjet e saj për të promovuar paqen dhe të drejtën ndërkombëtare. Njoftimi u bë këtë të premte nga kryetari i Komitetit Norvegjez të Nobelit, Jørgen Watne Frydnes, i cili prezantoi vendimin për dhënien e çmimit.
"Pillay i mbajti shtetet dhe udhëheqësit kombëtarë përgjegjës dhe u solli shpresë viktimave të dhunës dhe konfliktit, si dhe demonstroi një busull të fortë morale gjatë karrierës së saj të gjatë. Një fije e përbashkët shkon nga puna e saj e hershme në mbrojtje të Nelson Mandelës dhe të tjerëve që u ngritën kundër aparteidit deri te shërbimi i saj si gjyqtare në disa nga çështjet kryesore gjyqësore ndërkombëtare të kohës sonë”, tha Komiteti Norvegjez i Nobelit.
Pillay është një prej figurave të njohura të drejtësisë ndërkombëtare dhe mbrojtjes së të drejtave të njeriut, duke mbajtur edhe poste të rëndësishme në institucionet ndërkombëtare.
Navi Pillay ishte kryetare e Komisionit Hetimor të Kombeve të Bashkuara mbi Territorin e Pushtuar Palestinez, i cili arriti në përfundimin vitin e kaluar se Izraeli ka kryer gjenocid në Gaza.
"Nobel për Paqen" u jepet çdo vit individëve ose organizatave të njohura për kontributet e tyre në paqe.
Çmimi Nobel për Paqen është i pesti që jepet këtë javë, pas atij në letërsi, kimi, fizikë dhe mjekësi. Udhëheqësja e opozitës venezueliane, Maria Corina Machado, e fitoi në vitin 2025.
Çmimi Nobel për Paqen, me vlerë 12 milionë kurona suedeze, ose rreth 1.2 milionë dollarë, do të ndahet në Oslo më 10 dhjetor, në përvjetorin e vdekjes së industrialistit suedez Alfred Nobel, i cili themeloi çmimet./ZËRI
