SHBA- Chris LaCivita, strategu amerikan që drejtoi fushatën e Sali Berishës në zgjedhjet e 11 majit 2025, është rikthyer në qendër të vëmendjes, këtë herë në rrethin e presidentin amerikan, Donald Trump.
Presidenti Donald Trump u distancua të mërkurën nga dy prej këshilltarëve të tij kryesorë politikë, më pak se 30 ditë para zgjedhjeve të mesit të mandatit, duke shkruar se nëse puna e tyre e jashtme paraqet një konflikt, "Unë do t'i pushoj nga puna, menjëherë!"
“Nuk kam asnjë ide se për kë tjetër punojnë, por, pasi të reflektoj, do t’i pyes dhe, nëse ka një konflikt, do t’i pushoj nga puna, menjëherë!” shkroi Trump të mërkurën në Truth Social .
Paralajmërimi i Trump erdhi pasi gazeta The New York Times publikoi një raport që detajonte se si James Blair, një nga ish-zëvendësshefat e stafit të presidentit, i cili tani drejton operacionin e tij të jashtëm politik, dhe Chris LaCivita, bashkë-menaxheri i fushatës së Trump për vitin 2024, udhëtuan në Ballkan javën e kaluar për punë të paguar në emër të një qeverie pro-ruse.
Kush janë LaCivita dhe Blair
LaCivita, i cili bashkë-menaxhoi fushatën e Trump për vitin 2024, është një këshilltarë i lartë e PAC. LaCivita nuk është i panjohur me këshillimin e fushatave të huaja, ai është një emër i njohur edhe në Shqipëri. LaCivita ka qenë konsulent për Sali Berishën, në zgjedhjet e vitit 2025.
James Blair, i cili deri në maj ishte zëvendësshef i stafit të Shtëpisë së Bardhë dhe drejtor politik i fushatës së Trump për vitin 2024, drejton super-PAC MAGA Inc, e mbështetur nga Trump.
Udhëtimi në Ballkan
Dy këshilltarët, Chris LaCivita dhe James Blair, udhëtuan për në territorin vetëqeverisës të Republika Srpska në Bosnje dhe Hercegovinë përpara zgjedhjeve atje të dielën. Raportohet se qeveria e Republika Srpska i mbajti dhe i pagoi ata për të këshilluar mbi çështjet e votimit.
Detyra e tyre, sipas dy personave të njohur me angazhimin, ishte të jepnin këshilla mbi çështjet e votimit që lidheshin me entitetin e vogël ballkanik, i cili ka një popullsi prej 1.2 milion banorësh.
Por udhëtimi ka shkaktuar zemërim brenda botës së MAGA-s, me operativët që vënë në pikëpyetje pse dy nga këshilltarët e lartë politikë të Trump po punonin jashtë shtetit në një moment kaq kritik - dhe sa po paguheshin ata.
Tashmë, pas New York Times, edhe Financial Times shkruan për udhëtimin e dy këshilltarëve të Trump në Ballkan, jo thjesht në Republikën Srpska.
Joe Miller, Financial Times – Uashington, 7 tetor 2026
Donald Trump është distancuar nga dy prej strategëve të tij më të afërt elektoralë, pasi u zbulua se ata kishin udhëtuar në Ballkan për të këshilluar një qeveri proruse, më pak se një muaj përpara zgjedhjeve të mesmandatit në Shtetet e Bashkuara.
Në një postim në platformën e tij Truth Social, të mërkurën, presidenti amerikan deklaroi se bashkëpunëtorët e tij prej kohësh, Chris LaCivita dhe James Blair, “nuk punojnë për mua, përveçse si konsulentë të jashtëm”.
Por ai shtoi: “Nuk e kam idenë se për kë tjetër punojnë, por, pasi e mendova më mirë, do t’i pyes dhe, nëse ka konflikt interesi, do t’i largoj menjëherë!”
Deklaratat e Trump vijnë një ditë pasi The New York Times zbuloi se LaCivita, i cili bashkëdrejtoi fushatën presidenciale të Trump në vitin 2024, dhe Blair, i cili deri së fundmi mbante postin e zëvendësshefit të stafit të Shtëpisë së Bardhë, kanë këshilluar qeverinë e Republikës Srpska, një entitet vetëqeverisës brenda Bosnjë-Hercegovinës, përpara zgjedhjeve të së dielës së kaluar.
Blair dhe LaCivita punojnë aktualisht me MAGA Inc, një Super PAC (komitet veprimi politik) të lidhur me Trump, që disponon një fond prej 400 milionë dollarësh dhe financon shumë prej fushatave të kandidatëve republikanë.
MAGA Inc nuk iu përgjigj menjëherë kërkesës për koment.
Kur Blair u largua nga Shtëpia e Bardhë në prill, Trump e vlerësoi atë si “një nga mendjet politike më të ndritura në vend” dhe njoftoi se strategu republikan do të rikthehej në administratën e tij pas përfundimit të angazhimit në fushatën për zgjedhjet e mesmandatit.
LaCivita, i cili është këshilltar i jashtëm i MAGA Inc dhe nuk ka mbajtur kurrë një pozicion në stafin e administratës Trump, ishte një nga arkitektët kryesorë të rikthimit të presidentit në pushtet në vitin 2024.
Megjithatë, ai është përfshirë edhe më parë në polemika lidhur me aktivitetin e tij si këshilltar.
Në vitin 2024, revista The Atlantic raportoi se Trump ishte “tërbuar” pas një raportimi sipas të cilit LaCivita kishte fituar 22 milionë dollarë nga puna për fushatën presidenciale.
LaCivita më pas ngriti një padi kundër The Daily Beast, medias që kishte raportuar këtë shumë, duke pretenduar se informacioni ishte shpifës. Çështja u mbyll më vonë me një marrëveshje.
LaCivita është përballur gjithashtu me kritika nga disa pjesë të koalicionit MAGA të Trump, veçanërisht nga ish-strategu i Shtëpisë së Bardhë, Steve Bannon, për vendimin e tij për t'u rreshtuar me establishmentin e Partisë Republikane në mbështetje të senatorit aktual të Teksasit, John Cornyn, kundër rivalit të tij në zgjedhjet paraprake, Ken Paxton.
Presidenti përfundimisht mbështeti Paxton.
Të mërkurën, në Shtëpinë e Bardhë, Trump minimizoi pretendimet për konflikte të mundshme interesi lidhur me angazhimet e jashtme të LaCivita dhe Blair.
“Ata nuk kanë konflikt interesi, sepse janë njerëz të pavarur”, tha ai. “Nuk punojnë në Shtëpinë e Bardhë, nuk janë të ulur rreth tryezës së kabinetit apo diçka e tillë.”
Megjithatë, presidenti shtoi se do t'u kërkonte të dyve listën e klientëve të tyre./ZËRI
