SHBA - Sam Bankman-Fried, i cili dikur drejtonte një nga kompanitë më të mëdha të shkëmbimet të kriptomonedhave në botë, është shpallur fajtor për mashtrim dhe pastrim parash, pas një gjyqi të gjatë në SHBA.
Juria dha vendimin e saj, pas pesë orësh diskutimesh. Kështu duket se ishte fundi i një karrierës së një 31-vjeçari, që me anë të ‘kriptovalutave’ ishte bërë tepër i pasur. Bankman-Fried u arrestua vitin e kaluar pasi firma e tij, FTX, falimentoi.
Ai mund të përballet me burgosje të gjatë. "Sam Bankman-Fried kreu një nga mashtrimet më të mëdha financiare në historinë amerikane - një skemë shumë miliarda dollarëshe e krijuar, për ta bërë atë mbret të kriptovalutave", tha avokati amerikan Damian Uilliams, në një deklaratë pas vendimit.
“Ky rast ka qenë gjithmonë i hetuar për gënjeshtra, mashtrime dhe vjedhje”, shtoi ai.
Prokurorët kishin akuzuar Bankman-Fried se kishte gënjyer investitorët dhe huadhënësit dhe se kishte vjedhur miliarda dollarë nga shkëmbimi i kriptomonedhave FTX.
Mbi të rëndojnë 7 akuza, kryesisht që lidhen me mashtrimin dhe pastrimin e parave. Ai tha se ndërsa ka bërë gabime, ka vepruar me mirëbesim.
Pas vendimit, avokati i Bankman-Fried, Mark Cohen tha se klienti i tij nuk pranon akuzat. "Ne e respektojmë vendimin e jurisë, por jemi shumë të zhgënjyer me rezultatin. Bankman-Fried pohon pafajësinë e tij dhe do të vazhdojë të luftojë fuqishëm për akuzat kundër tij”, shtoi ai.
Një zëdhënës i Bankman-Fried nuk iu përgjigj menjëherë një kërkese të BBC për koment, nëse ai kishte në plan të apelonte vendimin.
Tre nga ish-miqtë dhe kolegët e tij të ngushtë, përfshirë ish-të dashurën e tij Caroline Ellison, u deklaruan fajtor dhe ranë dakord të dëshmonin kundër Fried, me shpresën për të ulje dënimesh.
"Qeveria e fitoi këtë çështje duke ushtruar shumë presion mbi bashkëpunëtorët, duke bërë marrëveshje me ta shumë herët dhe duke e gjykuar këtë çështje në një mënyrë shumë të efektshme," tha ish-prokurori federal Renato Mariotti.
Prokuroria paraqiti prova se firma e tregtimit të kriptovalutave të Bankman-Fried, Alameda Research mori depozita në emër të klientëve të FTX që në ditët e para të shkëmbimit financiar, kur bankat tradicionale nuk ishin të gatshme ta linin të hapte një llogari.
Në vend që t'i ruante ato fonde, siç Bankman-Fried u zotua vazhdimisht, ai i përdori paratë për të shlyer huadhënësit e Alameda, për të blerë prona dhe për të bërë investime dhe donacione politike.
Bankman-Fried u shpall fajtor e mund të dënohet me shumë vite burg. Ai pritet të përballet me një dënim, që shkon në dekada.
"Nuk kam bërë asnjë krim"
Bankman-Fried mbrojti transfertat e parave midis firmave të tij si "të lejueshme" dhe dëshmoi se ai nuk ishte në dijeni të boshllëkut financiar të përshkruar nga zëvendësit e tij, deri disa javë para falimentimit të FTX vitin e kaluar.
Falimentimi i kompanisë bëri që shumë kliente të FTX të mos merrnin dot paratë e tyre mbrapsht.
Gjyqi i Bankman-Fried u vëzhgua nga afër, për implikimet e tij në industrinë e kriptovalutave. Kjo industri pësoi një rënie të madhe vitin e kaluar. Para rënies së kompanive të tij, ai ishte parë të shfaqet disa herë në publik dhe kishte krijuar njohje me njerëz të njohur.
Kompania FTX u themelua më 2019 nga Bankman-Fried, një ish-tregtar në Wall Street, dhe ish-punonjësi i Google, Gary Uang. Ajo falimentoi dhe shumë përdorues nuk tërhiqnin fondet.
Kjo kompani u bë e dyta më e madhe në botë e këmbimit të kriptovalutave, duke tregtuar rreth 10 miliardë kriptovaluta në ditë./Zëri.ai/
