GAZA – ‘Komuniteti ndërkombëtar duhet të imponojë një zgjidhje për konfliktin Izrael-Hamas, pasi palët ndërluftuese nuk mund të pajtohen’, tha sot Përfaqësuesi i Lartë i Bashkimit Evropian për Punët e Jashtme dhe Politikën e Sigurisë, Josep Borrell.
"Unë mendoj se ne kemi mësuar në këto 30 vjet se zgjidhja duhet të imponohet nga jashtë, sepse të dyja palët nuk do të jenë në gjendje të arrijnë kurrë një marrëveshje", tha ai në një event në Lisbonë, duke paralajmëruar gjithashtu se nëse kjo tragjedi nuk mbaron së shpejti, e gjithë Lindja e Mesme mund të përfshihet në flakë.
Më herët sot, Ministria e Shëndetësisë e grupit islamik palestinez Hamas njoftoi se operacionet ushtarake izraelite në Rripin e Gazës kanë marrë jetën e 22,313 personave, që nga fillimi i luftës më 7 tetor. 128 persona janë vrarë në 24 orët e fundit, dhe 57,296 janë plagosur që nga 7 tetori./ZËRI/
