KILI- Të paktën 46 persona kanë humbur jetën për shkak të zjarreve të pyjeve që vazhdojnë të mbajnë të “pushtuar” Kilin qendror dhe jugor, njoftoi të shtunën presidenti i vendit Gabriel Boriç , duke shtuar se numri i të vdekurve me siguri do të rritet me kalimin e orëve.
"Dyzet njerëz vdiqën për shkak të zjarreve, gjashtë të tjerë humbën jeten në spital për shkak të djegieve. Ne e dimë se këto numra do të rriten," tha ai.
Ndërkohë, flakët kanë djegur rreth 430,000 hektarë në Kili, kryesisht në zonën turistike të Valparaiso, në bregdetin e Paqësorit të rrënuar nga temperatura shumë të larta. Gjithsej 92 zjarre ishin aktive deri mbrëmjen e djeshme, nga të cilat 40 ishin vënë nën kontroll, kryesisht në rajonin Valparaiso të Kilit perëndimor, por edhe në pjesët qendrore dhe jugore të vendit, njoftoi ministrja e Brendshme Carolina Toja. Gati 430,000 hektarë u shndërruan në hi, shtoi ajo.
Fotot që janë bërë virale në rrjetet sociale, të marra nga drejtuesit e makinave të bllokuara në vendngjarje, tregojnë malet e djegura pranë autostradës së famshme "Autostrada 68", një autostradë që mijëra turistë udhëtojnë për të arritur në plazhet e Paqësorit.
Të paktën 19 njerëz vdiqën në një sektor të vetëm të Viña del Mar, tha Toja më herët, duke sqaruar se ishte një numër "shumë i përkohshëm" pasi shërbimet e shpëtimit nuk mund të hynin ende në sektorë të tjerë të prekur gjithashtu nga zjarri./ZËRI
