SHBA- Amerika ka pezulluar ndihmën ushtarake për Ukrainën, gjë që ka ngjallur reagime të shumta nga liderët dhe politikanët evropianë, madje dhe nga vetë Volodymir Zelenskyy. Teksa ka debate nga të gjitha frontet, Minsku është gati të presë liderët e Shteteve të Bashkuara, Ukrainës dhe Rusisë për bisedime mbi përfundimin e luftës. Lajmin e tha presidenti i Bjellorusisë, Alexandër Lukashenko, fill pasi SHBA ngriu përkohësisht ndihmën ushtarake për Ukrainën.
Në një intervistë me Mario Nawfal, e cila u transmetua në televizionin shtetëror bjellorus, Lukashenko tha se ishte i gatshëm të ndihmonte presidentin amerikan Donald Trump të arrijë qëllimin e tij për të ndërmjetësuar paqen midis Kievit dhe Moskës.
"Nëse doni, ejani këtu. Kievi është vetëm 200 kilometra nga kufiri i Bjellorusisë. 30 minuta fluturim. Jeni të mirëpritur. Ne do të ulemi këtu, do të bëjmë një marrëveshje të qetë, pa zhurmë, pa bujë. I them Trumpit, jam duke e pritur së bashku me Putinin dhe Zelenskyy-n. Ne do të ulemi dhe do të negociojmë për të arritur një marrëveshje të qetë,"- i tha Lukashenko në Minsk.
Në Bjellorusi janë zhvilluar edhe bisedimet midis Ukrainës, Rusisë dhe Organizatës për Siguri dhe Bashkëpunim në Evropë (OSBE) në 2014 dhe 2015, të cilat rezultuan në Marrëveshjet e Minskut. Këto marrëveshje kishin për qëllim ndalimin e luftës në Donbas, e cila shpërtheu pas pushtimit rus të Ukrainës lindore në vitin 2014.
Pas propozimit, Rusia ka pranuar idenë e Lukashenkos, por edhe nuk ka asnjë sinjal nga Shtëpia e Bardhë.
Ndërkohë kryeministri i Britanisë së Madhe, Keir Starmer tregoi se ka diskutuar me Zelenskyy-n gjatë ditës së djeshme.
“Ne duhet të bëjmë gjithçka që mundemi për të siguruar që SHBA, Evropa dhe Ukraina të punojnë së bashku për të arritur një paqe të qëndrueshme,”- tha kryeministri britanik Keir Starmer.
Duke folur gjatë pyetësorit të Kryeministrit në Parlament, Starmer u tha deputetëve se po bënte "çdo gjë që mundem për të dhënë kontributin tim".
Nga ana tjetër, presidenti francez Emmanuel Macron po mendon të kthehet në Uashington për bisedime me presidentin ukrainas Volodymyr Zelenskyy dhe kryeministrin britanik Keir Starmer. Kështu tha zëdhënësja e qeverisë Sophie Primas në një konferencë për shtyp në Pallatin Elysee. Por ende nuk ka një datë.
Tashmë edhe Zelenskyy është gati për një armëpushim të pjesshëm. Ai gjithashtu shprehu gatishmërinë e tij për të konsideruar një armëpushim të pjesshëm nëse Rusia gjithashtu pronon marrjen e një hapi të tillë. Presidenti kërkon lirimin e robërve të luftës; armëpushim në hapësirën ajrore. Tashmë tonet kanë ndryshuar, priten vetëm vepra./ZËRI
