MADRID- Një rast i paprecedentë ka ndodhur në Sapnjë! Noelia, një 24-vjeçare me aftësi të kufizuara, kërkoi edhe njëherë para Gjykatës Administrative të Barcelonës që të ketë akses për t'ju nënshtruar eutanazisë, të drejtë që ajo e kërkon prej gati një viti. Por kërkesa e saj është kundërshtuar nga babai i saj. E reja ka denoncuar “shtrëngimin” që i bëhet nga "shoqëruesi i saj" që në këtë rast është i ati, i cili ia ka mbushur dhomën me kryqe të gjitha llojeve për ta bërë që të ndërrojë mendje.
Mosmarrëveshja ligjore filloi në gusht 2024, kur eutanazia e Noelias ishte planifikuar në ditën e dytë të atij muaji, por u pezullua urgjentisht pas një apeli të paraqitur nga babai i saj. Sipas tij, vendimi i vajzës së tij ishte rezultat i një gjendjeje mendore jo të qetë dhe aftësia e saj për të marrë vendime ishte e kompromentuar. Babai ishte përpjekur prej disa muajsh që ta pengonte.
Fillimisht, Gjykata e mbylli çështjen, duke qenë se një ekspert mjeko-ligjor arriti në përfundimin se e reja ruante aftësitë e saj njohëse, edhe pse i ati pretendon se e reja ishte e paralizuar pas një tentative për vetëvrasje në nëntor 2022.
Gjatë proceseve gjyqësore, të mbajtura me dyer të mbyllura, Noelia dëshmoi para gjyqtarit dhe përsëriti dëshirën e saj të vendosur për të ndërruar jetë duke shtuar se ka pritur për shumë kohë dhe nuk e ka ndryshuar qëndrimin e saj. Megjithatë, avokati i babait pretendon se e bija ka pasur vendime vetëvrasëse gjatë gjithë jetës së saj.
"Ajo ka tentuar disa herë vetëvrasjen që kur ishte adoleshente,”- tha babai i vajzës.
Nga ana tjetër, katër mjekët e parë që kanë dëshmuar para gjykatës (mes tyre një neuropsikolog dhe një specialist neurorehabilitues) kanë konfirmuar se Noelia ruan aftësitë mendore për të marrë vendime dhe për të shprehur vullnetin e saj. Nisur nga tentativat e ndryshme për vetëvrasje të së resë dhe historia e çrregullimeve mendore, Komisioni i Vlerësimit dhe Garancisë ka aplikuar një kriter të “maturisë së përforcuar” përpara se të autorizojë procedurën.
Komisioni, i përbërë nga 19 anëtarë, vlerësoi çështjen e Noelias dhe njëzëri konkludoi se ajo plotësonte kërkesat e përcaktuara me ligj. Pas seancës, gjyqtari u dha palëve një afat prej pesë ditësh për të paraqitur konkluzionet e tyre.
Pasi të jenë marrë raportet, do të merret një vendim përfundimtar për të përcaktuar nëse eutanazia e Noelias do të autorizohet apo jo. Por sërish vendimi mund të apelohet pranë Gjykatës së Lartë të Drejtësisë së Katalonjës./ZËRI
