GREQI- Kryeministri i Greqisë, Kyriakos Mitsotakis dhe qeveria e tij e djathtë po përballen me një mocion mosbesimi në Parlament. Sipas mediave greke, mocioni i mosbesimit është organizuar nga partitë opozitare, për katastrofën në Tempi dy vite më parë, ku humbën jetën 57 persona.
Noicioni pason protestat masive në të gjithë Greqinë të premten, ku demonstruesit shprehën zemërim për atë që ata e shohin si keqpërdorimin e vazhdueshëm të qeverisë, ndaj përplasjes hekurudhore në Tempi dhe dhënien e ngadaltë të drejtësisë për ngjarjen. Pas konsultimeve, PASOK, SYRIZA, Nea Aristera (e majta e re) dhe Plefsi Eleftherias (Kursi i Lirisë) nënshkruan një marrëveshje prej 16 faqesh që përshkruan përgjegjësinë, gabimet dhe lëshimet e qeverisë, lidhur me këtë ngjarje.
Ndërkohë kryeministri Kyriakos Mitsotakis foli për një përpjekje për të krijuar destabilitet kur foli në Parlament për çështjen e Tempit në debatin para rendit të ditës. Mitsotakis vuri në dukje se qeveria është e përkushtuar ndaj së vërtetës dhe drejtësisë.
“Vetëm drejtësia mund të hedhë dritë mbi tragjedinë, as partitë dhe as sheshet. Duhet t'i besojmë drejtësisë pavarësisht dyshimeve të shoqërisë. Nëse jo drejtësia, kush? Ju po frenoni dy prioritete të qeverisë qendrore. E para ka të bëjë me kapacitetin tonë në drejtim të mjeteve lëvizëse. Vendi, të paktën në linjën e truallit Athinë-Selanik, duhet të marrë trena modernë deri në vitin 2027. Ne do të bashkojmë OSE-ERGOSE-GEIOSE në Hekurudhat Greke dhe atje do të kërkojmë individë me njohje ndërkombëtare dhe shkencore. E dyta është se kush do të mbajë linjat,'-u shpreh kryeministri grek.
Tragjedia në Tempi
Përplasja tragjike e dy trenave kokë më kokë, trenit të mallrave dhe trenit të pasagjerëve në afërsi të Larisës, u mori jetën 57 personave. Treni Intercity 62 i linjës Athinë-Selanik po kalonte pranë stacionit të Larisës pak para orës 23:00 të së martës (28 shkurt), me 341 pasagjerë dhe një ekuipazh prej 13 anëtarësh. Pak minuta më vonë, ndodhi tragjedia. Pavarësisht se linja hekurudhore Athinë-Selanik është e dyfishtë, treni i pasagjerëve u përplas kokë më kokë me një tren mallrash që udhëtonte në drejtim të kundërt, duke bërë që tre vagonët e parë të dilnin nga shinat dhe të përfshiheshin nga flakët./ZËRI
