SHBA-Fjalimi i Donald Trump në Kongresin Amerikan, ka sjellë reagime nga vendet që preken nga urdhrat ekzekutivë. Kina i është përgjigjur presidentit Donald Trump për vendimin e tij për të vendosur tarifa ndaj produkteve kineze që hyjnë në SHBA.
Ambasada kineze në SHBA, tha se për Washingtonin se gjëja e duhur do të ishte të konsultohej me Kinën si partnerë të barabartë, para se të ndërmerren këto masa.
"Nëse SHBA dëshiron luftë, qoftë ajo një luftë tarifash, një luftë tregtare apo çfarëdo lloj lufte, ne jemi gati të luftojmë deri në fund. Kundërmasat tona për të mbrojtur të drejtat dhe interesat tona janë absolutisht legjitime dhe të nevojshme. SHBA-ja, jo dikush tjetër, është përgjegjëse për krizën e fentanilit brenda vendit. Në frymën e humanizmit dhe vullnetit të mirë ndaj popullit amerikan, ne kemi ndërmarrë hapa të fortë për të ndihmuar Shtetet e Bashkuara në adresimin e çështje. Në vend që të njohin përpjekjet tona, SHBA-të po përpiqen të shpifin dhe ia hedhin fajin Kinës dhe po kërkojnë të bëjnë presion dhe shantazh ndaj Kinës me rritjen e tarifave. Ata po na dënojnë që i ndihmojmë. Kjo nuk do të zgjidhë problemin e SHBA-së dhe do të dëmtojë dialogun dhe bashkëpunimin tonë në luftën kundër drogës. Bullizmi nuk na tremb. Ngacmimi nuk funksionon me ne. Presioni, shtrëngimi ose kërcënimet nuk janë mënyra e duhur për t’u marrë me Kinën. Kushdo që përdor presionin maksimal ndaj Kinës po zgjedh ‘llojin e gabuar’ dhe bën një llogaritje të gabuar”,-deklaroi zëdhënësi i Ministrisë së Jashtme kineze.
Nga ana tjetër teksa Trump ritheksoi interesin për të marrë kontrollin e Groenlandës, kryeministri i ishullit, Mute Egede ka deklaruar se vendi nuk është në shitje dhe banorët e Groenlandës nuk dëshirojnë të jenë amerikanë.
“Groenlanda është e jona. Ne nuk duam të jemi amerikanë, as danezë, ne jemi goenlandezë. Amerikanët dhe liderët e tyre duhet ta kuptojnë këtë. Ne nuk jemi për shitje dhe nuk mund të marrim thjesht. E ardhmja jonë vendoset nga ne në Groenlandë”, ka thënë Mute Egede.
Presidenti Donald Trump mbajti 100 minuta fjalim në Kongresin amerikan.Trump tha se territori i Groenlandës është i rëndësishëm për sigurinë kombëtare të SHBA-së dhe se administrata e tij “po punon me të gjithë palët për ta marrë atë”. Sa i përket tarifave, ai njoftoi se për partnerët tregtarë të SHBA-së do të "fillojnë" më 2 prill./ZËRI
