SHBA- Një e treta e njerëzve në 14 vende të Ballkanit Perëndimor, Kaukazit dhe Azisë Qendrore përdorën antibiotikë pa recetë mjekësore, sipas një sondazhi të publikuar së fundmi nga Rajoni Evropian i Organizatës Botërore të Shëndetësisë (OBSH). Sondazhi përfshiu 8221 pjesëmarrës, gjysma e të cilëve raportuan se kishin marrë antibiotikë në 12 muajt e fundit.
Pjesëmarrësit ishin nga Shqipëria, Armenia, Azerbajxhani, Bjellorusia, Bosnja dhe Hercegovina, Gjeorgjia, Kazakistani, Kirgistani, Mali i Zi, Maqedonia e Veriut, Moldavia, Taxhikistani, Turqia dhe Uzbekistani. Arsyet më të zakonshme të përmendura për marrjen e antibiotikëve ishin ftohja (24%), simptoma të ngjashme me gripin (16%), dhimbje të fytit (21%) dhe kolla (18%). Këto shpesh shkaktohen nga viruse të paprekura nga antibiotikët.
Në të 14 vendet, një e treta (33%) e të anketuarve konsumuan antibiotikë pa recetë mjekësore, në dallim nga 8% e banorëve në Bashkimin Evropian të anketuar në një anketë të ngjashme në 2022. Rezultatet e studimit janë alarmante pasi antibiotikët nuk kanë efekt për viruset e përmendura. Llojet e ndryshme të antimikrobikëve – si antibiotikët për bakteret, antiviralët për viruset dhe antimykotikët synojnë lloje specifike të mikroorganizmave. Ndërsa AMR është një fenomen natyror, zhvillimi dhe përhapja e superbaktereve po përshpejtohet nga keqpërdorimi i antimikrobikëve, duke i bërë infeksionet më sfiduese për t'u trajtuar në mënyrë efektive.
“Realiteti alarmant është se, pa ndërhyrje të menjëhershme, AMR mund të rezultojë në deri në 10 milionë vdekje në vit deri në vitin 2050. Për më tepër, kjo barrë bie në mënyrë disproporcionale mbi vendet me të ardhura të ulëta dhe mesatare, duke përkeqësuar pabarazitë shëndetësore globale,” sipas OBSH-së.
Sipas studiuesëve dhe mjekëve studimi tregon qartë nevojën për edukim dhe rritje të ndërgjegjësimit.Vendet kanë rregullore në fuqi për të mbrojtur antibiotikët nga keqpërdorimi, për shembull, parandalimi i shitjeve pa recetë. Zbatimi i këtyre rregulloreve do të zgjidhte shumicën e keqpërdorimit të antibiotikëve tek njerëzit.
