SHBA-Presidenti amerikan Donald Trump është zotuar se do ta zbatojë vendimin e tij për të vendosur tarifa doganore ndaj vendeve evropiane që kundërshtojnë kërkesën e tij për të marrë kontrollin e Groenlandës.
“Nuk mendoj se do të rezistojnë shumë. Duhet ta marrim”,-këmbënguli presidenti republikan i SHBA-së, Donald Trump, duke iu përgjigjur një gazetari në Florida se çfarë synon t’u thotë evropianëve, të cilët e kanë bërë të qartë se kundërshtojnë planin e tij.
Trump kërcënoi gjithashtu me një taksë prej 200% mbi verërat dhe shampanjën franceze, në përgjigje të deklaratës së Macron se Franca nuk do t’i bashkohej këshillit të paqes në Gaza.
“Do t’i rris në 200% tarifat doganore për verërat dhe shampanjat e tyre. Dhe ai do të bashkohet. Por nuk është i detyruar të bashkohet”, deklaroi Trump në Florida.
Burime pranë presidentit francez Macron i thanë Agjencisë Franceze të Lajmeve se Parisi nuk ka ndërmend, në këtë fazë, t’i japë “ndonjë vazhdim pozitiv” thirrjes së Uashingtonit që kreu i shtetit francez të bëhet pjesë e “Këshillit të Paqes” të presidentit republikan.
Aleatët evropianë janë mbledhur rreth sovranitetit të Groenlandës. Ministri i jashtëm i Danimarkës theksoi se presidenti i SHBA-së nuk mund ta kërcënojë rrugën e tij drejt pronësisë së territorit gjysmë-autonom danez. Sekretarja e Jashtme e Mbretërisë së Bashkuar, Yvette Cooper, përsëriti qëndrimin e Mbretërisë së Bashkuar se e ardhmja e Groenlandës u takon vetëm “grenlandezëve dhe danezëve” të vendosin.
