SHBA-Kompania Meta është përballur me humbje të njëpasnjëshme në gjykatë për mënyrën se si platformat e saj kanë dëmtuar përdoruesit e rinj, por një gjyq i cili pritet të mbahet nesër mund të ndryshojë Instagram dhe Facebook. BBC shkruan se gjyqi do të mbahet në kuadër të një padie të ngritur në vitin 2023 nga 30 shtete amerikane, përfshirë Kaliforninë dhe Nju Jorkun, në të cilën ata pretendojnë shkelje të shumta të ligjeve federale dhe shtetërore të privatësisë për fëmijët.
Konkretisht shtetet që kanë paditur 'Metën' po kërkojnë shumë ndryshime në mënyrën se si funksionojnë Instagram dhe Facebook për të rinjtë:
-Verifikim prindëror për përdoruesit adoleshentë
-Ndryshime në algoritmet që rekomandojnë përmbajtje
-Kufizime për filtrat që ndryshojnë pamjen në foto
-Ndalimin e luajtjes automatike të videove
-Kufizime për krijimin e llogarive të shumta
-Ndryshime në postimet që zhduken, si Instagram Stories
-Kufizime për njoftimet që synojnë t’i rikthejnë përdoruesit në aplikacione
Numri i "pëlqimeve", për shembull, ka qenë pjesë e Meta-s që nga vitet e para të saj, kur ende quhej Facebook dhe kjo ishte platforma e saj e vetme.
Sot, pëlqimet janë të kudondodhura në platformat e mediave sociale. Është mënyra kryesore me të cilën njerëzit ndërveprojnë me tekstin, fotot dhe videot që shohin në internet. Megjithatë, pëlqimet po shihen gjithnjë e më shumë si një mënyrë për të nxitur ndjenja negative, veçanërisht tek të rinjtë.
Sipas shteteve, këto funksione janë krijuar për t’i mbajtur përdoruesit, përfshirë fëmijët dhe adoleshentët, në platformat e Metës për sa më gjatë të jetë e mundur. Meta i mohon akuzat. Kompania ka deklaruar se nuk pajtohet me pretendimet dhe se provat do të tregojnë angazhimin e saj për të mbështetur të rinjtë.
Në padinë e shteteve kundër Metës, në të cilën kompania tha se kishte dorëzuar më shumë se 2 milionë dokumente, avokatët vunë në dukje hulumtimin e vetë Metës që tregoi se akuza të ngjashme nxisnin "krahasimin social", ose aktin mendor të vlerësimit të vetvetes kundrejt imazheve të dikujt tjetër.
Ky krahasim social i nxitur nga Instagram ishte i lidhur me "rritje të vetmisë, imazh më të keq të trupit dhe humor ose ndikim negativ", sipas hulumtimit të brendshëm të Metës.
