KOSOVË-Faton Hajrizi është varrosur ditën e sotme në varrezat e fshatit Klinë e Ulët të Komunës së Skenderajt në Kosovë. Në ceremoninë e varrimit kanë marrë pjesë familjarët, miqtë e tij dhe një numër i madh qytetarësh. Para kohës së varrimit, qindra qytetarë nga vende të ndryshme të Kosovës kanë udhëtuar drejt vendlindjes së Faton Hajrizit për funeralin e 39-vjeçarit, i cili u vra nga autoritetet e Serbisë më 19 korrik.
Ceremonia mortore u shoqërua me brohorima me zë të lartë nga të pranishmit “Lavdi” dhe “UÇK", madje u vendosën postera me mbishrimin: Dy duar për një kokë, e kokën për atdhe!
Rruga drejt fshatit si dhe ajo e varrezave u mbushu me flamuj kuqezi në të dy anësoret e saj, për të treguar amanetin e tij të fundit mbi Shqipërinë.
Faton Hajrizi u arratis nga një burg në Kosovë më 6 korrik, ndërsa disa ditë më pas, më 18 Korrik, qëlloi për vdekje një polic serb dhe plagosi kolegun e tij në orët e para të 18 korrikut në Lloznicë, qytet në pjesën perëndimore të Serbisë. Pas sulmit, autoritetet serbe e shpallën në kërkim. Një ditë më pas, më 19, Faton Hajrizi u vra nga autoritetet serbe pranë kufirit të Lloznicës. Ministri i Brendshëm i Serbisë tha se Hajrizi hapi zjarr ndaj Policisë dhe për këtë arsye u ekzekutua menjëherë nga forcat e rendit./ZËRI
