KORÇË- Gjykata e Korçës ka caktuar masën e sigurisë “arrest në burg” për 83-vjeçarin Agim Shkullaku, i cili 3 ditë më parë, plagosi me çifte djalin e tij.
83 vjeçari nga fshati Stropckë pas një sherri që ka patur me djalin e tij 47 vjeçarin Përparim Shkullaku, ka qëlluar dy herë me çifte në gjoks ndaj tij, duke e lënë të plagosur rëndë.
Pak ditë më parë para grupit hetimor, 83-vjeçari është shprehur se e ka plagosur djalin e tij në gjendje të rënduar psikologjike pas dhunës së ushtruar nga i biri.
Organi i akuzës ka kërkuar arrest me burg për të moshuarin, masë e cila është pranuar nga gjykata ndërkohë që mësohet se avokati mbrojtës edhe për shkak të moshës së Shkullakut, ka kërkuar masën e sigurisë “arrest shtëpie”.
47 vjeçari ndodhet në gjendje të rëndë shëndetësore në spitalin e Traumës në kryeqytet por jashtë rrezikut për jetën. /ZËRI/
