TIRANË- Një 43-vjeçar i shpallur në kërkim për trafik droge dhe pjesëmarrje në një organizatë kriminale është arrestuar sot në Tiranë. Bëhet fjalë për Ergys Likaj, i cili do të ekstradohet drejt Italisë. Likaj është dënuar me burg nga Gjykata e Romës në vitin 2016, për veprat penale “Organizatë kriminale” dhe “Trafikimi i narkotikëve”.
“Lokalizohet, kapet dhe arrestohet provizorisht, me qëllim ekstradimi drejt Italisë, Ergys Likaj, 43-vjeç i shpallur në kërkim ndërkombëtar.
Si rezultat i shkëmbimit të informacioneve dhe i koordinimit të punës me homologët italianë, shërbimet e Drejtorisë së Forcës së Posaçme Operacionale (Fast Albania), në kuadër të operacionit “Operacionalja 27”, lokalizuan në Pogradec dhe arrestuan provizorisht shtetasin e shpallur në kërkim ndërkombëtar, E.L., 43 vjeç, banues në Durrës.
Gjykata e Romës/Itali, në vitin 2016, ka caktuar për këtë shtetas masën e sigurisë “Arrest me burg”, për veprat penale “Organizatë kriminale” dhe “Trafikimi i narkotikëve”, parashikuar nga Kodi Penal i Italisë.
Interpol Tirana po bashkëpunon me Interpol Romën për të finalizuar procedurën e ekstradimit të këtij shtetasi në Itali”, njofton Policia./ZËRI
