TIRANË- Mungesa e mjekëve të familjes dhe urgjencës, e ka detyruar Ministrinë e Shëndetësisë dhe Mbrojtjes Sociale të heqë konkurimin për studentët që duan të ndjekin specializimet në këto dy degë. Për këtë vit, kërkohen 60 mjekë familjeje dhe urgjence. Për të përmbushur këtë kërkesë, të gjithë ata që do të ndjekin këto degë, do të kenë dhe lehtësira.
Studentët që kanë mbaruar mjekësi, por edhe mjekët e familjes, të cilët nuk kanë specializim, mund të aplikojnë deri në datën 24 qershor për të frekuentuar studimet e specializuara dhe për këtë do të paguhen. Ndërkohë për ata që e kanë një vend pune, MSHMS garanton ruajtjen e vendit të punës pas përfundimit të studimeve.
Gjatë një vizite në spitalin e Librazhdit, ministrja e Shëndetësisë dhe Mbrojtjes Sociale, Albana Koçiu u bëri thirrje mjekëve dhe studentëve që të aplikojnë në fazën e dytë të specializimit për mjekë familje dhe urgjence. Gjatë fjalës së saj, Koçiu u shpreh se nga muaji korrik do të nisë dhe rritja e pagave për secilën kategori. Ndërkohë shtoi se MSHMS ka mundësuar edhe programin e veçantë në mbështetje të mjekëve dhe infermierëve për kredi me 0% interes për blerjen e banese.
Albana Koçiu: Ja në specializime që ju mundësojnë që përgjatë tre viteve të studimit të merrni pagën 100% të pagës së mjekut specialist gjatë periudhës së specializimit. Qeveria shqiptare dhe MSHMS punuan dhe realizuan premtimin për të rritur akoma më shumë pagat edhe për mjekët e përgjithshëm dhe infermierët këtë vit me 20 mijë lekë mbi pagën ekzistuese për mjekët përgjithshëm dhe me 15 mijë lekë mbi pagën ekzistuese për të gjithë infermierët. Kushdo që nuk ka një banesë dhe është në kërkim të shtëpisë të tij të parë i jep mundësi këtë vit 45 kuotava për të përfituar nga kreditë falas për shtëpi. E ka mundësinë që të marrë një kredi me interes zero nga shteti kjo falë bashkëpunimit edhe të mbështetjes që MSHMS, qeveria shqiptare i japin mjekëve dhe infermierëve të rinj.
Specializantët mund të kryejnë praktikat mjekësore jo vetëm në spitalet universitare, por edhe në spitalet rajonale pranë vendbanimeve të tyre, e mund të rikthehen sërish atje pas përfundimit të studimeve./ZËRI
