SHKODËR- Detaje të reja janë bërë me dije në lidhje me atentatin e dështuar ndaj Gjon Nikës në Grudë të Re të Shkodrës. Raportohet se autorët e ngjarjes, kanë përdorur tre kallashnikovë për të eleminuar "shënjestrën", por fatmirësisht Gjon Nika dhe kunati i tij, Gjergj Ndershtiqaj shpëtuan. Ata mësohet se kanë marrë nga dy plagë, por ndodhen jashtë rrezikut për jetën.
Ndërkohë pasi autorët kanë nisur të qëllojnë në drejtim të tyre, Nika, Ndershtiqaj dhe një person tjetër që ndodhej me ta në mjet, ende i paidentifikuar kanë dalë nga mjeti dhe kanë vrapuar në tokat rreth vendit të ngjarjes.
Policia ka ngritur pika të shumta kontrolli me qëllim kapjen e autorëve, të cilët dyshohet se kanë përdorur dy makina. Në ndihmë të Policisë së Shkodrës kanë shkuar dhe efektivë të repartit RENEA. Ndërkohë në Shkodër ka mbërritur dhe kryepolici Muhamet Rrumbullaku./ZËRI
