KAKAVIJË- Protesta e fermerëve greke ka shkaktuar bllokadë në mbarë vendin dhe jo vetëm. Aksi rrugor Kakavijë-Janinë në kryqëzimin e fshatit Kallpaq, do të jetë i bllokuar gjatë ditës së sotme. Policia kufitare ka bërë me dije se bllokimi i aksit do të nisë që nga oa 12:30 deri në një njoftim të dytë, ndërsa bëhet me dije se do të lejohen të qarkullojnë vetëm automjetet e emrgjencave shëndetësore.
Njoftimi i Policisë:
Kakavijë-Policia Kufitare Kakavijë, nëpërmjet qendrës së përbashkët të shkëmbimit të informacionit Kakavijë, është njoftuar nga Policia Kufitare Greke se ditën e sotme, nga ora 12:30 (me orën greke) deri në një njoftim të dytë, aksi rrugor Kakavijë–Janinë, në kryqëzimin e fshatit Kallpaq, do të jetë i bllokuar për shkak të protestës që do të zhvillojnë fermerët.
Do të lejohen të qarkullojnë vetëm automjetet që do të kenë emergjenca shëndetësore.
Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete, në orare të tjera të ditës.
Kjo nuk është herë e parë që aksi Kakavijë-Janinë blloket për shkak të protestave të fermerëve grekë. Protestat e tyre kanë përshkallëzuar, duke sjellë kufizim në të gjithë vendin, ndërsa kanë refuzuar edhe takimin e negociatave me kryeministrin grek Kyriakos Mitsotakis./ZËRI
