TIRANË- Byroja Kombëtare e Hetimit ka shpallur garën për vendin vakant të zëvendësdrejtorit, pas emërimit të Joni Ketës në krye të këtij institucioni, ku mund të marrin pjesë vetëm hetuesut të BKH-së. Konkretisht, 60 hetues të Byrosë Kombëtare të Hetimit, të cilët për të aplikuar për zëvendësdrejtor duhet që të plotësojnë disa kritire.
Kandidatët e interesiar duhet të plotësojnë dhe dorëzojnë dokumentet si më poshtë:
- Kërkesë për aplikim;
- Një platformë mbi kuptimin e funksionit të Zëvendësdrejtorit, rolit në fushën e menaxhimit, menaxhimit të burimeve njerëzore, komunikimit, punës në grup, ndërveprimit dhe marrëdhënieve ndërinstitucionale ;
- Jetëshkrimi ;
- Vlerësimin e fundit nga eprori direkt;
- Çdo dokumentacion tjetër që vërteton trajnimet, kualifikimet, arsimim shtesë, vlerësimet pozitive apo të tjera të përmendura në jetëshkrimin tuaj.
- Certifikatë mbi njohurit e gjuhës angleze.
Dokumentet duhet të dorëzohen fizikisht pranë Drejtorisë së Burimeve Njerëzore në Byronë Kombëtare të Hetimit. Kjo drejtori do të jetë përgjegjëse për kompletimin, verifikimin dhe përditësimin e dokumentacionit deri në përfundimin e procesit të përzgjedhjes.
Afati i fundit për dorëzimin e dokumentacioneve është brenda datës 22 janar 2026. Ndërsa procesi i përzgjedhjes do të zhvillohet nga Drejtuesi i Prokurorisë së Posaçme dhe Drejtori i BKH-së, në përputhje me procedurat ligjore në fuqi.
Hapja e garës për zëvendësdrejtor në BKH, vjen pas emërimit të Joni Ketës në krye të Byrosë Kombetare të Hetimit. Joni Keta u zgjodh nga Këshilli i Lartë i Prokurorisë me 11 vota pro, në mbledhjen e 9 dhjetorit. Vendimi u mor në mënyrë unanime, pas leximit të relacionit të SPAK, që përzgjidhte Ketën si kandidatin e duhur, mes 6 të tjerëve në garë. Mandati i Ketës në krye të BKH-së do të jetë 5-vjeçar, pa të drejtë rikandidimi./ZËRI
