E vërteta e kthimit! Denoncimi për vrasje dëboi Lentin dhe Meçen nga Dubai

Plaurent Dervishaj dhe Julian Mecaj

DUBAI- Ekstradimi i Plaurent Dervishajt dhe Julian Meçajt nga Dubai drejt Shqipërisë, ka ndodhur për një gabim të tyre, më shumë sesa për meritë të autoriteteve shqiptare. Sipas gazetarit Elton Qyno, dy personazhet e njohur të botës së krimit në Durrës, kanë pasur një konflikt në Dubai me një shtetas të huaj, që solli më pas edhe ndalimin e tyre. Në policinë vendase, personi në fjalë ka bërë një denoncim se Plaurent Dervishaj dhe Julian Meçaj, do e vrisnin, gjë e cila ka bërë që policia e Emirateve Arabe të ndalojë me shumë urgjencë dy shqiptarët e shpallur në kërkim nga Shqipëria për “vrasje”, “tentativë vrasje”, “trafik kokaine”, “Shkatërrim i pronës me tritol”, “Sigurim kushte për të kryer vrasje” të kryer në formën e “Grupit të strukturuar kriminal”.

Autoritet e migracionit në Policinë e Dubait, që nga dita e arrestimit kanë mbajtur në ambientet e një kampi për gati 1 muaj, Plaurent Dervishaj dhe Julian Meçaj, deri në momentin kur dy ditë më parë ata janë deportuar me shumë urgjencë në drejtim të Shqipërisë.

Sipas burimeve nga Policia e Shtetit autoritet në Dubai e kanë motivuar deportimin e Dervishaj dhe Meçaj, me faktin se ata kanë shkelur rëndë rregullat e qëndrimit në territorin e Emirateve të Bashkuara Arabe, duke kryer vepra penale në shoqërinë e tyre.

Për pasojë ata kanë vendosur ti deportojnë në shtetin e origjinës në Shqipëri, ku si Dervishaj dhe Meçaj, i presin dy procese penale të hapura nga prokuroria e posaçme SPAK.

Deportimi është kryer pa pritur një vendimmarrje nga Gjykata e Dubait, që shqyrton rastet e të drejtave të emigrantëve, të cilët kanë arritur të fitojnë lejen e qëndrimit.

Por me sa duket një rol të rëndësishëm për deportimin e menjëhershëm në Shqipëri të Plaurent Dervishaj dhe Julian Meçaj, ka luajtur dhe marrëveshja e firmosur në muajin Prill 2024 mes ish-ministrit të Brendshëm Taulant Balla dhe Ministrit të Emirateve të Bashkuara Arabe, të cilën parashikuan deportimin e shqiptarëve që kërkoheshin nga Drejtësia në Shqipëri për vepra të rënda penale.

Të dy personat e deportuar ishin me leje qëndrimi në Dubai, duke pasur të drejtën ta shtynin atë dhe në vitet në vijim.

Në muajin Dhjetor 2020, Plaurent Dervishaj, u arrestua dhe më pas u lirua pasi SPAK në Shqipëri e kishte shpallur në kërkim për akuzën e Vrasjes së biznesmenit Vajdin Lamaj, Artan Arsi dhe Klodian Saliu, ngjarje këto të ndodhura në muajin Shkurt 2005.

Por nuk kaloi shumë dhe sërish Plaurent Dervishaj së bashku me Julian Meçaj, shpallet në kërkim për vrasjen e shtetasit Andi Maloku, Vrasjen e mbetur në tentativë ndaj prokurorit Arjan Ndojës dhe Landi Muharremit, “Sigurim i kushteve për të kryer vrasjen e babait të Andi Malokut”, Vjedhje, Trafik Kokaine etj.

Ndërkohë për vrasjen e Andi Malokut, dhe tentativën e vrasjes së Arjan Ndojës dhe Landi Muharremit, pak muaj më parë u dënua me burgim të përjetshëm Redjan Rraja dhe me 35 vite burgim Ariol Halilaj.

Në mujin shkurt 2024 në Dubai arrestohet dhe më pas lirohet miku i tij, Julian Meçaj, i cili u pajis me leje qëndrimi.

Deportimi me shumë urgjencë nga Dubai i Plaurent Dervishaj dhe mikut të tij Julian Meçaj, solli tronditjen e parë të botës së krimit që qëndrojnë si rezidentë në “parajsën” e Emirateve të Bashkuara Arabe.

Gjatë kësaj kohe SPAK, ishte në pritje të ekstradimit të Durim Bamit, një vrasësi me pagesë nga Nikla e Fushë-Krujës, por pak ditë më parë kjo procedurë “dështoi” dhe Durim Bami mundi të lerë qelinë duke qëndruar i lirë në kompleksin e tij të banimit.

Por një tjetër procedurë e përshpejtuar ishte në planet e SPAK dhe Policisë së Shtetit, të cilët prej 1 muaji kishin nisur negociatat për deportimin “top sekret” të dy emrave të njohur të botës së krimit, Plaurent Dervishaj dhe Julian Meçaj.

Në muajin qershor 2019, Julian Meçaj, Plaurent Devishaj dhe Bashkim Haxhia, i shpëtuan një atentati të mirëorganizuar në Sukth të Durrësit,teksa po udhëtonin me një automjet tip “Range-Rover”, kur u qëlluan nga dy persona në mënyrë të befasishme.

Kjo ngjarje vijon të jetë ende pa autor ndërsa dosja ndodhet në prokurorinë e Durrësit. Përplasjen më të madhe grupi i Plaurent Dervishaj e ka me grupin e Aleksandër Lahos (Rrumi) që bazën e veprimit e ka në Shijak.

Ndërsa në konflikt Dervishaj është dhe me grupin e Xhevdet Troplinin e njohur si “Poja” si dhe me vetë grupin shoqëror ku ai aderonte të ish-kunatit të tij, Lulzim Berisha, i cili pritet të ekstradohet shumë shpejt nga Spanja në Shqipëri.GRUPI I PLAURENT DERVISHAJT

1.    Plaurent Dervishaj

2.    Julian Meçaj

3.    Redjan Rraja

4.    Ramazan Rraja

5.    Xhelal Rraja

6.    Bledar Polovina

7.    Amar Shkëmbi alias (Dritan)

8.    Genti Nderjaku (alias Kili, alias Ekil)

9.    Bashkim Haxhija

10.  Julian Pjetri

11.  Endri Sinani

12.  Ariol Halilaj

Plaurent Dervishaj dhe Julian Meçaj, u lanë dje në masën arrest në burg nga GJKKO. Mbi Julian Meçajn rëndon akuza për “pjesmarrje në grup të strukturuar kriminal”, “kryerja e veprave penale nga grupi organizata kriminale”. Ndërsa Plaurent Dervishaj akuzohet për “pjesëmarrje në grup të strukturuar kriminal” dhe “kryerjen e veprave penale organizata kriminale”.

Dervishaj dhe Meçaj u shprehën para trupit gjykues se ata erdhën vetë në vendin tonë për t’u përballur me drejtësinë dhe kërkuan masa më të “buta” sigurie. Ata u shprehën para gjyqtares Rudina Palloj se nuk përbëjnë rrezik arratisje. Gjykata iu komunikoi masat e sigurisë vetëm për atentatin ndaj prokurorit Arjan Ndoj, ku humbi jetën shoferi i tij, Andi Maloku dhe u plagos Aleksandër Jaho. Në seancën që u mbajt në GJKKO ishte i pranishëm dhe vetë kreu i Prokurorisë së Posaçme, Altin Dumani. /ZËRI 

Në përputhje me standarded JTI