TIRANË- Vendoset në pranga 36-vjeçari, Isniq Nokshiqi, i cili përplasi me mjetin e tij efektivin e Policisë Rrugore. Ngjarja ndodhi pak ditë më parë në zonën e Freskut në Tiranë, teksa efektivi dhe kolegu i tij ishin vendosur për të hapur trafikun në zonë, pasi do të kalonte eksorta e kryeministrit Edi Rama.
Teksa efektivët po kryenin detyrën e tyre, drejtuesi i mjetit Isniq Nokshiqi, 36 vjeç, me origjinë nga Tropoja, i cili po priste radhën për të kaluar, ka nisur që të shajë dhe të bërtasë nga brenda mjetit. Edhe pse dy efektivët i janë afruar për ta qetësuar, ai sërish i është kthyer me tone të ashpra dhe i ka ofenduar. Në momentin që njëri prej policëve ka qenë para makinës, ai i ka dhënë gaz mjetit dhe e ka marrë para për disa metra, duke i rrezikuar seriozisht jetën.
Aktualisht, efektivi është në spital dhe ka fraktura në disa pjesë të trupit.
"Në vijim të informacionit paraprak të ditës së djeshme, për aksidentin e ndodhur në Fresk, ku për pasojë mbeti i dëmtuar 1 punonjës policie, ju bëjmë me dije: Rreth orës 17:30, në zonën e Freskut, shërbimet e Komisariatit të Qarkullimit Rrugor, të cilët kanë qenë në shërbim, i kanë bërë shenjë ndalimi automjetit me drejtues shtetasin I. N. (i cili u identifikua më pas). Pas ndalimit të automjetit, drejtuesi ka shfaqur shenja nervozizmi dhe ka filluar të debatojë dhe të kundërshtojë me fjalë punonjësit e Policisë. Drejtuesi i automjetit është larguar me shpejtësi me automjet duke aksidentuar punonjësin e Policisë së Qarkullimit Rrugor shtetasit A. L. dhe duke rrezikuar jetën e punonjësve të tjerë të Policisë. Për pasojë është dëmtuar punonjësi i Policisë A. L., i cili ndodhet në spital, në kujdesin e mjekëve. Në përfundim të veprimeve është arrestuar shtetasi I. N., 36 vjeç, banues në Tiranë, për veprën penale “Vrasja e punonjësit të Policisë së Shtetit”, mbetur në tentativë,"-bën me dije Policia.
Edhe pse i rrezikoi jetën efektivit, 36-vjeçari u largua nga vendi i ngjarjes, por u vendos në pranga vetëm pak orë më pas nga punonjësit e Komisariatit nr. 4. I riu tashmë ka mbi vete akuzën "vrasja e punonjësit të Policisë së Shtetit"./ZËRI
