TIRANË- Dëshmia e të penduarit të drejtësisë, Artan (Marjus) Tafani, tregoi qartë së Laert Haxhiu, edhe pse nuk i kishte përfunduar planet, kishte ndjekur e përndjekur dy prokurore e një avokat bashkë me familjet e tyre. Një prej tyre është edhe pjesë e Drejtësisë së Re, anëtare e Prokurorisë së Posaçme Kundër Korrupsionit dhe Krimit të Organizuar (SPAK), Doloreza Musabelliu. Sot, Musabelliu është marrë në mbrojtje me kërkesën e Kryeprokurorit Altin Dumani, por pa e ditur, e kishte pasur Haxhiun edhe në dyert e shkollës së fëmijëve.
Kush është Doloreza Musabelliu?
Doloreza Musabelliu është 42 vjeçe, nga Poliçani. Shumë herë është etiketuar si ‘gruaja e hekurt’ e drejtësisë, pasi ka hetuar ‘masakrën e Lushnjes’, Emiljano Shullazin, dosjen Toyota Yaris dhe çështjen e avionit të rrëzuar në Ishëm që u raportua se ishte ngarkuar me hashash. Musabelliu është emëruar që në fillimet e karrierës së saj pranë Prokurorisë së Krimeve të Rënda dhe ka qenë shpesh e përzgjedhur nga autoritetet franceze për hetimet dypalëshe, pasi e zotëron dhe gjuhën frënge. Musabelliu ka qenë prokurore në Prokurorinë e Krimeve të Rënda dhe pas shkrirjes së këtij institucioni, kaloi prokurore në Tiranë. Ajo ka qenë edhe drejtuese e njësisë Task Forcë pranë Prokurorisë së Krimeve të Rënda. Arsyeja se përse Haxhiu e kishte futur në rreth të kuq ishte dosja e ‘Masakrës së Lushnjes’. Ajo kërkoi dënimin me burgim të përjetshëm për Orgest Bilbilin dhe Anterio Kaloshin, ndërsa ka ende në fazë Laert Haxhiun.
Merita Selimi, prokurorja që u shkarkua
Më herët në ‘listën e zezë’ ishte futur një tjetër prokurore në qytetin e Lushnjës, e quajtur Merita Selimi. Selimi ishte prokurorja që hetoi Laert Haxhiun, Orgest Bilbilin dhe Anterio Kaloshin për masakrën e vitit 2017, ku mbeti i vrarë Zamir Latifi dhe Jurgen Hoxha, ndërsa u plagosën Bujar Turku dhe Marjus Xhepexhiu. Pas dy viteve hetime, Selimi shpalli moskopetencën duke sjellë dosjen ndaj tre të pandehurve në SPAK. Prokurorja Merita Selimi u shkarkua me shumicë votash në muajin Korrik 2023 nga Komisioni i Pavarur i Kualifikimit, pas problemeve të konstatuara me burimet financiare të një apartamenti në Tiranë dhe me likujditetet. Një votë “pro” kalimit të saj të procesit të “Vettingut” ishte ajo e Lulzim Hamitaj, por nuk mjaftoi.
Merita Selimi e ka filluar karrierën në sistemin e drejtësisë në vitin 1992 dhe prej atëherë ka punuar në Prokurorinë e Lushnjës. Së fundmi, pas konfigurimit të hartës së re gjyqësore, ajo e ushtron detyrën në Prokurorinë e Fierit. Gjatë seancës dëgjimore, KPK bëri me dije se subjekti rezultonte me një bilanc negativ prej 3.1 milionë lekësh për krijimin e pasurive dhe likujditeteve. Selimi këmbënguli se ajo kishte pasur burime financiare të mjaftueshme për pasurinë e saj dhe kërkoi konfirmimin në detyrë. Ndoshta shkarkimi i saj, pezulloi planet e Haxhiut…
Avokati Adriatik Doga, i shpëtoi atentatit
Avokati Adriatik Doga, sipas të penduarit të drejtësisë Artan (Marjus) Tafani, ka qenë gjithashtu një nga shënjestrat e Haxhiut. Në rrëfimin e bërë para prokurorëve, Tafani ka treguar se Doga i ka shpëtuar vdekjes në fraksion sekonde, në muajin Tetor 2021 në Lushnjë. Për vrasjen e avokatit sipas bashkëpuntorit të prokurorisë ishte impenjuar personalisht Laert Haxhiu. Tafani, Haxhiu dhe Lulzim Arapi kanë shkuar dhe janë pozicionuar para banesës së Dogës. Por, në momentin që grupi kriminal do të vinte në punë armët, Doga, rastësisht ka takuar një fqinjin e tij. Kjo ka bërë që tre personat, Artan Tafani, Laert Haxhiu dhe Lulzim Arapi, të mos veprojnë. Vetë Doga ka mohuar të ketë pasur njohje apo konflikte me të. Ndërsa Tafanin thotë se e njëh, pasi e ka kushëri.
