DURRËS- Një leje për të ndërtuar një agro-turizëm, bar restorant në Shkallnur të Durrësit ka sjellë një përplasje mes zhvilluesit dhe pronarëve të tokës ngjitur, familjes Quku. Në një sqarim për "OraNews", përfaqësuesi i familjes Quku denoncon faktin se investitori i pajisur me leje ndërtimi pretendon të marrë 5 mijë metra tokë, të cilën familja e tij e ka të regjistruar me certifikatë pronësie.
“Ka ardhur një person me një certifikatë dhe një projekt dhe na cenon tek pronat dhe na futet tek 5 mijë metrat tokë. Na cenon duke na thënë që kam certifikatë dhe leje ndërtimi. Ky person kërkon të bëjë një resort agro-turizëm. Pasuria është 35/2 që është tokë-shkëmb dhe e mbrojtur nga shteti. Në certifikatën e tij kjo rezulton të jetë tokë-arë,"- thotë përfaqësuesi i familjes Quku.
Investitori është blerësi i tretë i tokës ku do ndërtohet agro-turizmi, por në fakt problemet nisin që në mënyrën sesi është regjistruar trualli ku kompania "Idi 2005 shpk" kërkon që të ndërtojë. Trualli ku po investohet, pasuria numër 35/2 me sipërfaqe 28.183 metra, në fakt rezulton të jetë tokë shkëmb në pronësi të shtetit; kjo derisa në vitin 2010 u bë "arë".
Për të kuptuar përse ka ndodhur ky ndryshim nga Hipoteka e Durrësit, është kërkuar informacion nga drejtoresha e Përgjithshme të ASHK-së, Lorena Goxhobelli, por edhe Kadastra në Durrës.
Por edhe pse është kërkuar informacion, nuk ka asnjë përgjigje.
Sipas "OraNeës", Elvis Pengili, drejtues i këtij ASHK në Durrës refuzon të vërë në dispozicion historikun e kësaj pasurie edhe pse eprorja e tij, Pengili që brenda 10 ditësh t’i vendosë në dispozicion të medias sqarimin e kërkuar. Por ende nuk ka asnjë sqarim prej tij.
Probleme nuk ka vetëm me Kadastrës, pasi edhe nga ana e saj, Bashkia Durrës ka refuzuar të dërgojë në terren një topograf që të kryejë matjet dhe të përcaktojë sipërfaqen e tokës ku ka mbivendosje për të shuar konfliktin mes palëve./ZËRI
