TIRANË- Një aksident i rëndë me pasojë vdekjen e një personi ka ndodhur pak minuta më parë në Tiranë. Incidenti ka ndodhur në zonën e Kopshtit Zoologjik. Mësohet se si pasojë e aksidentit ka mbetur viktimë, Arjan Shahaj student i Akademisë së Sigurisë. Zëri.ai ka mësuar se shkak i aksidentit është bërë lagështia në rrugë krijuar si pasojë e reshjeve të shumta të shiut dhe shpejtësia.
Shanaj po lëvizte me shpejtësi në autostradën nga Sauku në drejtim të digës së Liqenit. Sipas njoftimit të policisë viktima ndërsa ka qenë duke udhëtuar me mjetin e tij ka humbur kontrollin dhe është përplasur me një tjetër makinë drejtuar nga Ylli Rama, e si pasojë e përplasjes së fortë dhe përmbysjes së mjetit, ka gjetur vdekjen në vend.
Njoftimi i policisë:
Më datë 08.11.2023, në afërsi të liqenit artificial, automjeti me drejtues shtetasin A. Sh. dyshohet se është përplasur me automjetin me drejtues shtetasin Y. R.
Si pasojë e aksidentit, ka humbur jetën në vendngjarje, shtetasi A. Sh. (student në Akademinë e Sigurisë). Grupi hetimor ndodhet në vendngjarje dhe po punon për sqarimin e rrethanave të aksidentit.
Për shkak të reshjeve të shiut që kanë qenë prezente gjatë gjithë ditës dhe në të gjithë territorin e vendit tonë, aksidentet rrugore kanë qenë të shumta.
