SARANDË- Një sherr masiv ka agravuar në përdorimin e armëve të zjarrit në fshatin Gjashtë të Sarandës. Në përplasjen që ka ndodhur paraditen e sotme, ishin të përfshirë 12 persona, mes tyre edhe 4 punonjës të Policisë së Shtetit. Efektivët e përfshirë në përplasje janë 3 vëllezërit: Kidi, Ergis dhe Redi Sulejmani; e po ashtu edhe i afërmi i tyre Alvaro Sulejmani. Këta të fundit kishin marrë me qira një makinë tek dy vëllezërit Enea dhe Albi Nexhipi.
I përfshirë në sherr, krah Sulejmanëve, ishte edhe Igli Duka, ish-efektiv i Policisë Sarandë, i cili më parë është arrestuar në Skoci për përfshirje në një operacion të kultivimit të marijuanës. Me vete kishin edhe një tjetër person me mbiemër Beqir Çocka.
Lidhur me ngjarjen, Agjencia e Mbikëqyrjes Policore ka bërë një reagim lidhur me sherrin masiv duke bërë me dije se AMP ka vendosur në pranga 8 persona, mes tyre 4 punonjës të Policisë së Shtetit. Efektivët e arrestuar janë: Kidi, Ergis, Redi dhe Alvaro Sulejmani. Në gjendje të lirë për “shkatërrim të pronës” dhe “plagosje e lehtë me dashje” po hetohen dy vëllezërit, Enea dhe Abinon Nexhipi. Ndërsa në kërkim janë shpallur Igli Duka dhe Beqir Çocka. Këta të fundit akuzohen për veprat penale: “Shkatërrim i pronës”, “Plagosje e lehtë me dashje”, “Kanosja”, “Kundërshtimi i punonjësit të policisë së rendit publik”. Gjithashtu, nga AMP është bërë me dije se të lartpërmendurve u janë sekuestruar 3 pistoleta, 4 automjete dhe 7 aparatë celularë.
Nga ajo që dihet deri më tani, konflikti mes tyre ka nisur pikërisht për detyrimin e qiramarrjes së automjetit. Në total, 10 persona shkuan për të dhunuar dy vëllezër Abinon dhe Enea Nexhipin, pasi Alvaro Sulejmani e kishte marrë mjetin, por nuk kishte paguar paratë. Në rrëfimin e tyre, gjatë marrjes në pyetje, vëllezërit janë shprehur se ishin kërcënuar dhe sharë prej kohësh nga të tjerët e përfshirë në ngjarjen e sotme.
"Alvaro Sulejmani kishte marrë 1 makinë me qira dhe jo vetëm nuk e ktheu në kohen e duhur por as nuk pagoi asnjë para për përdorimin e makinës me qira. Prej ditësh na ka sharë, kërcënuar dhe fyer. Dje, vonë në mbrëmje, Alvaro Sulejmani ka telefonuar një prej vëllezërve Nexhipi duke i kërkuar që të takohej për të sqaruar dhe dhënë lekët e qirasë,"-treguan dy vëllezërit.
Por për shkak të orës së vonë, vëllezërit Nexhpi nuk kanë pranuar që të dalin nga banesa dhe punonjësi i Policisë, Alvaro Sulejmani i është vetëofruar që të shkojë tek banesa e tyre. Sapo vëllezërit Nexhipi kanë zbritur, poshtë banesës kanë gjetur me mbi 10 persona, disa prej të cilëve kanë qëlluar edhe me armë zjarri. Po sipas dëshmisë së dy vëllezërve, në vendin e ngjarjes ka shkuar edhe një patrullë policie, por nuk ka vepruar. Madje kanë lejuar që të përfshirët në konflikt të largohen nga vendi i ngjarjes dhe nuk i kanë shoqëruar.
Nga ana tjetër, efektivët e Policisë pretendojnë se janë konfliktuar me grushte dhe sende të forta. Madje në versionin e tyre të ngjarjes, shtojnë se janë ata personat që janë sulmuar nga vëllezërit Nexhipi. Edhe pse ishin këta të fundit që përfunduan në spital, për të marrë mjekim pas lëndimeve nga goditja me sende të forta./ZËRI
