SARANDË- Një punonjës i Policisë së Shtetit është pezulluar nga detyra dhe ndaj tij ka nisur një hetim disiplinor. E gjitha ka nisur pas publikimit të një videoje në rrjetet sociale. Në pamje, shfaqet inspektori i Policisë, Arben Islamaj, i cili është kapur duke duke mbajtur armën e shërbimit gjatë një mosmarrëveshjeje me disa qytetarë në Ksamil. Kështu që pas publikimit të videos, Policia reagoi duke e pezulluar nga detyra. Po ashtu, ndaj tij ka nisur edhe një hetim disiplinor.
"Në lidhje me një video të publikuar sot në rrjetet sociale, ku shfaqet një punonjës policie, i angazhuar si trupë shërbimi roje në një pikë bllokimi automjetesh në Ksamil, duke mbajtur në dorë armën e shërbimit gjatë një mosmarrëveshjeje verbale me disa qytetarë, ju sqarojmë se: Me publikimin e rastit, punonjësi i Policisë, inspektor A. I., me detyrë trupë shërbimi në Seksionin e Rendit në Komisariatin e Policisë Sarandë është pezulluar menjëherë nga detyra dhe ndaj tij ka nisur hetimi disiplinor, deri në sqarimin e plotë të rrethanave të ngjarjes. Drejtoria Vendore e Policisë Vlorë falënderon qytetarët dhe mediat që denoncojnë rastet e shkeljeve dhe i fton sërish ata të denoncojnë çdo rast të tillë në numrin 112, duke garantuar anonimat të plotë dhe reagim të paanshëm,"- njoftoi Policia./ZËRI
