TIRANË- Pasi kaluan festat e fundvitit pranë familjarëve të tyre, emigrantët po kthehen në vendet ku jetojnë dhe punojnë. Fluksi në pikat kufitare ka kapur sërish pikun, por tashmë në drejtim për dalje të vendit. Sipas të dhënave të siguruara nga pikat kufitare, në 24 orët e fundit drejt Greqisë dhe Italisë kanë ikur rreth 11 mijë persona.
Në Kapshticë kanë hyrë rreth 1900 persona dhe kanë dalë 3700 qytetarë.
Në Kakavijë kanë hyrë 1600 persona dhe kanë dalë 2800. Në këtë pikë kufitare kanë hyrë 1691 mjete, nga të cilat 690 në hyrje dhe 1001 në dalje. Edhe në Qafë Thanë ka pasur "shtesa", pasi rreth 1.900 persona kanë hyrë në vendin tonë dhe 2.900 kanë dalë.
Shtim të fluksit ka pasur edhe në portin e Durrësit. Nga ky port, drejt Italisë kanë ikur 2,100 shtetas shqiptarë, ndërsa në vendin tonë kanë hyrë 450. Fluksi i largimeve pritet të zgjasë deri më datë 6 janar dhe më pas, çdo gjë i rikthehet normalitetit./ZËRI
