SARANDË- Agjencia e Mbikëqyrjes Policore ka bërë një reagim lidhur me sherrin masiv që ka ndodhur në Sarandë, ku u përfshinë dhe disa punonjës policie. Ndaj, AMP ka vendosur në pranga 8 persona, mes tyre 4 punonjës të Policisë së Shtetit.
Efektivët e arrestuar janë 3 vëllezërit, Kidi, Ergis dhe Redi Sulejmani; e po ashtu edhe i afërmi i tyre Alvaro Sulejmani. Në gjendje të lirë për “shkatërrim të pronës” dhe “plagosje e lehtë me dashje” po hetohen dy vëllezërit, Enea dhe Abinon Nexhipi. Ndërsa në kërkim janë shpallur Igli Duka dhe Beqir Çocka. Këta të fundit akuzohen për veprat penale: “Shkatërrim i pronës”, “Plagosje e lehtë me dashje”, “Kanosja”, “Kundërshtimi i punonjësit të policisë së rendit publik”. Gjithashtu, nga AMP është bërë me dije se të lartpërmendurve u janë sekuestruar 3 pistoleta, 4 automjete dhe 7 aparatë celularë.
NJOFTIMI I AMP:
AMP arreston 4 punonjës policie dhe 4 shtetas, 2 shtetas referohen në gjendje të lirë dhe 2 shtetas shpallen në kërkim
Më datë 02.01.2025, rreth orës 01:30, Agjencia e Mbikëqyrjes Policore në bashkëpunim me Komisariatin e Policisë Sarandë, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, ka bërë të mundur parandalimin e një ngjarje të rëndë, pasi në fshatin Gjashtë të Sarandës, përballe një biznesi restorant, janë konfliktuar me sende të forta disa shtetas, ku nga verifikimet dhe veprimet e kryera, jane identifikuar shtetasit E. N. dhe A. N., të cilët janë dëmtuar me sende të forta dhe janë jashtë rrezikut për jetën. Punonjësi i policisë A.S gjatë konfliktit ka përdorur dhe ka qëlluar me armën e shërbimit. Gjithashtu, të përfshirë kanë qënë edhe shtetasit I. N. dhe O. B., të cilët janë konfliktuar me punonjësit e policisë I. S., A. S., M. S. dhe E. S., si dhe shtetasit Sh. S., B. Ç., K. Xh., I. D., D. D. dhe K. S.
Nga veprimet hetimore të kryera nga AMP (këqyrja në vendin e ngjarjes, këqyrja e kamerave dhe deklarimet e marra) ka arrestuar në flagrancë për veprat penale “Vrasje me dashje e mbetur në tentativë”, “Shkatërrim i pronës”, “Plagosje e lehtë me dashje”, “Kanosja”, “Kundërshtimi i punonjësit të policisë së rendit publik”. Punonjësit e policisë: 1. A.S., me detyrë SPZ në Komisariatin e Policisë Himarë (I dyshuar për veprën penale “Vrasje me dashje e mbetur në tentativë”) 2. I.S., me detyrë agjent në seksionin e hetimit në Komisariatin e Policisë Sarandë 3. M.S., student në Akademinë e Sigurisë 4. E.S., me detyrë inspektor në Komisariatin e Policisë Sarandë. Shtetasit: 1. K. S.; 2. Sh. S.; 3. D. D.; 4. K. S. U ndoqën në gjendje të lirë për veprat penale “Shkatërrim i pronës” dhe “Plagosje e lehtë me dashje”, shtetasit E. N. dhe A. N. Janë shpallur në kërkim për veprat penale “Shkatërrim i pronës”, “Plagosje e lehtë me dashje”, “Kanosja”, “Kundërshtimi i punonjësit të policisë së rendit publik”, shtetasit I. D. dhe B. Ç. Në cilësinë e provave materiale janë sekuestruar 3 pistoleta, 4 automjete dhe 7 aparatë celularë. AMP mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të strukturave mbikëqyrëse, duke telefonuar në numrin e gjelbër 0800 9090, ose duke dërguar Email në adresën [email protected]./ZËRI
