DURRËS- Një 19-vjeçar i shpallur në kërkim për plagosjen e rëndë të 3 personave është arrestuar në fshatin Pjezë të Shijakut. Sipas njoftimit të Policisë, 19-vjeçari Lorik Çelmeta ishte shpallur në kërkim, pasi dyshohet se në bashkëpunim me një tjetër, mbrëmjen e 26 korrikut kanë goditur me mjete prerëse 3 persona.
Gjykata e Durrësit ka caktuar masën "arrest në burg" për 19-vjeçarit për "Plagosje e rëndë me dashje", ndërsa vijon puna për kapjen e shtetasit tjetër M.H.
Njoftimi i Policisë:
Shijak/Finalizohet operacioni i koduar "Village".
Kapet në fshatin Pjezë, 1 shtetas i shpallur në kërkim, i akuzuar si bashkëpunëtor në plagosjen e rëndë të 3 shtetasve.
Drejtoria Vendore e Policisë Durrës, në bashkëpunim me Komisariatin e Policisë Shijak dhe me Njësinë Operacionale të DVP Durrës, ka organizuar operacionin e koduar “Village”, bazuar në informacionet e siguruara për vendodhjen e një shtetasi në kërkim, i cili fshihej në një fshat.
Si rezultat i operacionit, u kap në fshatin Pjezë, Shijak, dhe u ndalua shtetasi L. C., 19 vjeç, banues në Shijak.
Ky shtetas ishte shpallur në kërkim pasi dyshohet se mbrëmjen e datës 26.07.2026, në lagjen nr. 13, Durrës, në bashkëpunim me shtetasin M. H. (në kërkim), gjatë një konflikti për motive të dobëta, kanë goditur me mjete prerëse, 3 shtetas.
Gjykata e Shkallës së Parë e Juridiksionit të Përgjithshëm Durrës, më datë 04.08.2026, ka caktuar masën e sigurisë "Arrest në burg", për shtetasit L. C. dhe M. H., për veprën penale "Plagosja e rëndë me dashje”, kryer në bashkëpunim.
Vijon punë për kapjen e shtetasit M. H..
Materialet procedurale i kaluan Prokurorisë, për veprime të mëtejshme.
