SHËNGJIN- 16 emigrantët që mbërritën në Shëngjin u shoqëruan në qendrat e kontrollit nën masa të rrepta sigurie. Siç edhe duket nga pamjet e publikuara nga "TopChannel", emigrantët kanë zbarkuar në Shëngjin, por gjithë kohës kanë qenë të monitoruar nga efektivët e Policisë italiane. Pasi janë verifikuar për më shumë se tre orë në port, janë nisur për në kampin e Gjadrit, nga ku edhe do të ndjekin procedurat për azil në Itali. Nga 16 emigrantët e parë që vijnë në vendin tonë, 10 prej tyre janë nga Bangladeshi dhe 6 të tjerë janë nga Egjipti.
Anija “Libra” u nis nga Lampedusa dy ditë më parë. Bazuar në protokollin e nënshkruar nga kryeministrja Giorgia Meloni dhe homologu i saj shqiptar, Edi Rama, azilkërkuesit do të marrin një përgjigje brenda katër javësh: nëse përgjigja është pozitive ata do të transferohen në qendrat e pritjes në Itali. Përndryshe, ata do të kthehen në vendin e tyre të origjinës.
Ndërsa banorët e Gjadrit kanë protestuar kundër vendimit të qeverisë. Banorët protestuan në hyrje të kampit me pankarta ku shkruhej: Ëndrra evropiane përfundon këtu! /ZËRI
